متشوقين للقصة :p هاه.... [b]
اولا السلام وعليكم ورحمة الله وبركاته

هذي قصه جتني على الإيميل وابيكم تقرونها ....

هاذي قصة لاحد الشباب وهو يرويها عن نفســه ... اترككم مع هالقصة
انا ياطويلين العمر كاي شاب من شباب السعوديه داج هاج لا شغله ولا مشغله..سمعت عن شي اسمه نت وشات

وبنات قلت خل ادخل هالعالم واشوف.. طبعا اول شي تعلمته الشات والماسنجر والحركات هذي..
ادمنت على الشات على الفاضي ..والله يعلم اني ماكنت ادخله عشان البنات بس اني تعرفت لي على شلة
شباب ينحطون على الجرح يبرى .. كنا ندخل كل يوم سوالف وضحك وذب على هالبنيات .

.ومره من المرات لفت انتباهي نك جديد معنا .. ما كان نك ولد كانت بنت .. اسلوبها ماكان يدل على انها
جديده على الشات يعني لها خبره وداخله بقوه معنا حش وتهزيئ ..
الشهاده لله كانت خفيفة دم موتتنا ضحك .. كنا بمقهى انا والعيال وماتسمع الا ضحكنا .. اللي صار اني

تهاوشت انا وياها وكان لسانها طويل بس ماكانت تقل أدبها يعني تذب وتتطنز .. والحقيقه سكتتنا كلنا ..
انا بديت بس احتري اللحظه اللي تدخل فيها هالبنت ..صح كنا بس نتهاوش بس كنت انبسط على هالحال..
ماكنت احب حركات البنات وقلة الحيا والمصخره حقتهم ..هذي كانت نوع ثاني تدخل تتهاوش وتضحك وتطلع..

يوم بعد يوم صرت اتحمس للدخله عشانها واحتريها بالساعات لين تدخل .. الين مره كنت داخل وانا معصب
كان ايام اختبارات ونتيجتي زفت..دخلت ومثل دايم بدت هي تتحرش وانا منيب ناقص .. بديت اغلط عليها
والبنت على طولة لسانها بس زي ماقلت لكم محترمه مايطلع منها الغلط .. حست اني زودتها وطلعت من الشات
انا تحسفت على اللي سويته ..حسيت اني بنهبل لو مالقيتها دورتها بس عجزت ألقاها ..وكان فيه صديقاتها

قلت لهم ابي ايميلها ومارضوا يعطوني اياه..

دخلت من بكرا احتريها واشوى دخلت .. واكلمها ومطنشتني بالعامه .. كبيره بحقي انها تسفهني وعند
الشباب.. رحت لها برايفت اعتذر واقولها اني غلطت بحقك بس كانت لي ظروفي وانا آسف.. والبنت نفس الشي
ماردت علي حتى برايفت .. بعدين ردت على بالعامه وقالت لي وش تبي؟ ..قلت لها ابي ريال .. قالت حسافه
عليك .. هنا على انها ردت علي باسلوب جاف بس ارتحت انها ردت ولا زعلت..

شوي شوي بديت احس اني اميل لها واحب اسولف معها على ان السوالف كلها مطاقات زي ماقلت لكم..

قلت لها مره ابي ايميلك عشان ارسلك ايميلات مع القروب حقي.. قالت تبي الايميل ولا تبي تحتك ؟ بنت اللذين
دايم ردودها قويه .. قلت لها بكيفك ماتبين انتي حره .. قالت اكيد حره اجل عبده عندك؟ انا ارتفع ضغطي
وقلت والله لا اجيب ايميلها لو على جثتي.. وفكرت وشلون اوصله .. جت ببالي فكرة اني ادخل بنك بنت ..

وسويتها ودخلت وكانت هي داخله ..وجلسنا نسولف على اساس اني بنت.. وقلت لها اني حبيتك احس انك صديقتي
لزوم حركات البنات طبعا .. قالت تسلمين ..قلت لها انا هيفاء ممكن ايميلك عشان اسولف معك لاني مادخل
شات كثيرقالت لي طيب وعطتني ايميلها ..انا هنا حسيت اني مسوي انجاااااز ..اخذت الايميل وحفظته عندي

ويوم دخلت الشات رحت لها برايفت قلت هاه ماودك تعطيني ايميلك ؟قالت بالجنه ..قلت طيب يا (...)<=كتبت
ايميلها .. قالت وش تبين ياهيفاء؟ انا يوم قالتها ضحكت ضحك لاشعوري .. اعجبتني سرعة بديهتها وتصريفها
اني قفطتها ..وبدت تصرف اني عارفه انه انت وانا محجر لها بالحكي.. اللي صار اني اضفتها..

كل ماجت اون لاين اروح احارشها وهواش ومطاقات وظف وجهك وانقلعي وغيره من حكي العرابجه ..حتى والله

ياشباب اني بديت اشك انها ولد بس صديقاتها كانوا معنا بالشات ويدرسون معها وهذا الاثبات الوحيد..

ومره جت اون لاين ودخلت لها ..

عمكم says:
ياكثرك ياشيخه بكل وقت اون لاين

انا وبس says:
طيب

عمكم says:
طيب؟ غريبه اول مره تقولين شي زين

انا وبس says:
يعني؟

عمكم says:
يعني بالعاده انطم ولا كل تبن ولا وش دخلك

انا وبس says:
اها

عمكم says:
انتي صاحبة الايميل؟

انا وبس says:
ايه انا

عمكم says:
اجل وش السالفه؟

انا وبس says:
مافيه سالفه بس اني تعبانه ومافيني حيل

عمكم says:
تعبانه ؟ وش فيك ؟

انا وبس says:
مزكمه وحالتي حاله وحرارتي اربعين

عمكم says:
احسسسسسسسسسن دوم دوم

انا وبس says:
شكرا يجي منك اكثر ماتقصر
وطلعت اوف لاين

ويوم قالت كلمتها الاخيره حسيت بخنجر يطعن بوسط قلبي حسيت اني كنت قاسي بكلامي معها وانها من جد

تعبانه .. بعدين قلت لا اكيد مافيها شي وعادي اللي صار..

مر يوم ويومين وثلاثه والبنت ماجت اون لاين.. وشفت صديقتها اون لاين رحت اسلم عليها..ونسولف وحاولت

أجس النبض عن خويتها وراها ماتدخل.. وفعلا جا طاريها وقلت لها وينها من زمان عنها.. قالت انها تعبانه

ومرقده بالمستشفى..انا ضاق صدري ذاك اليوم كله متنكد ..واذكر سخافتي يوم اني ادعي عليها..وبس

استنى متى اسمها يجي اون لاين.. لين جا ذاك اليوم وتجي ويفز قلبي وانقز لها.. بس كانت تكلمني من طرف

خشمها ويحق لها طبعا تزعل..وارسل لها ايميل اني كنت احسبها تستهبل يوم تقول تعبانه ..ورضت البنت

وعدت على خير..

تطورت العلاقه أكثر وأكثر ..وصرنا زي الاخوان نمون ونغلي بعض مره.. يمكن غلاها لي يختلف شوي عن غلاي لها

...كانت تغليني كاخ بس..اما انا فلا كانت تعني لي شي كبييير مره..حتى اليوم اللي ماتدخل فيه اون لاين

يمر طويييل علي..وما كان فيه شي يربطنا الا الماسنجر البنت بنت ناس ومحترمه يعني ماكان فيه امل تلفون

وهذا اللي كان عاجبني فيها .. خفيفة دم واستهباليه وعاقله ومحترمه وبنت ناس..كانت دايم افكاري

تاخذني وتوديني .. وافكر فيها بشكل يومي .. لدرجة اني بديت افكر فيها بشكل جدي .. واخطط اني اخطبها

وانها بتكون لي..كان فيه عوائق كثيره تمنعني.. منها اني ماعرف هي بنت مين.. وهل هي بترضى فيني..

وتبادلني نفس الشعور ولا لا.. واني كنت اصغر منها .. ماكان الفرق كبير سنه واقل بعد .. جسيت نبضها مره

من ضمن سوالفنا لو تقدم لك احد اصغر منك توافقين ؟ قالت ايه اوافق الرجال بعقله ماهو بعمره .. انا

يوم سمعت هالجمله طرت من الفرحه نص همي راح لانه اغلب البنات حسب معلوماتي يفضلون ياخذون شياب..

واللي ابيه وصلت له .. هنا تحمست اني اعرف منهي البنت وكان شي جدا صعب خصوصا مع وحده محترمه وسمعتها

نظيفه.. عرفت باي مدرسه هي واسمها الاول وطبعا ماكان عن طريقها عن طريق غلطه من وحده من صديقاتها

جبت كتاب دايم مدرستهم تطلعه كل سنه شفت الاسم وعرفت العائله وخلاص ارتحت وطبعا سكت وماحاولت ابين وخفت اني اقولها اطيح من عينها ولا تتغير نظرتها لي..

قلت بترك الامور تمشي زي مالها

اني اعرفها مع انها كانت تعرف اسمي الكامل..

ما كان فيه شي يقهرني فيها الا قوة باسها وغرورها ..ومع هذا تعجبني احس كل شي فيها غير عربجتها عنادها

اسلوبها القوي قوة شخصيتها ..طبعا ماقولكم اني قيس الوفي اللي مايشوف بالدنيا الا هالبنت ..طبعا ماسنجري

مليان بنات واغلبهم صديقاتها ..بس كل ماسولفت مع وحده منهم ..ماحس بالوناسه اللي احسها لا سولفت معها

مع ان هالبنات فيهم الناعمه والعربجيه وغيرهم بس على قولة خالد المريخي اغليه بس وشلون لا تسالوني

الحب من الله يجي ماله اسباب..



الجزء الثاني
تكملة القصة.........


((((

مرت سنه وسنتين وثلاث .. وكل سنه يزيد تعلقي فيها عن اللي قبلها كبرنا ودخلنا الجامعه.. وهمي كبر معي

مادري وشلون ابين لها شعوري ناحيتها ..غير نظرتها هي بمواضيع الحب اللي تحطمني مره بعد مره..لان البنت

ماتعترف بهالاشياء ومالها وجود بحياتها ..يمكن تقولون هالشي يشجعني اكثر على اني ابين لها مشاعري..

يمكن مع غيرها بس معها بالذات مستحيل لانها ماهي من النوع السهل ولا الهين..البنت ذكيه وتفكيرها كبير

هي واللي مقدر بيصير لي ..اذا فيني خير الله بيسهل امري ..

مرت الايام صارت البنت بثالث وانا بثاني جامعه .. هنا بديت افكر البنت باقي لها سنه وحده بس..يمكن

تتخرج وتنخطب وتروح علي واتعذب..قلت مافيه الا حلين ياما اني اشتغل ولا اني اخذ كورسات صيفيه..

حلين احلاهم مر بس قررت اني اخذ كورسات صيفيه عشان نتخرج مع بعض .. وفعلا اخذت كورسات صيفيه والحمد لله

تخرجت البنت وانا تخرجت ..وتوظفت بوظيفه محترمه ..

بعد فتره ماصرت اشوف البنت اون لاين .. ضاق صدري وحسيت انه فيه شي ..ليش ماتدخل ..ووش اللي صاير..

طبعا البنت اصلا ماكانت تدخل عشاني ولا كانت تحس باللي احسه لها هذا حسب نظرتي لها ولاسلوبها معي..

بس كان عندي امل انها تبادلني لو شوي من هالشعور .. وانا حايس بكل هالافكار ..جت صديقتها اون لاين

رحت لها وسالت عنها ..قلت لها وين فلانه عسى ما شر ما صرت اشوفها ..قالت انخطبت واحتمال توافق..

مادري وشلون ابين لكم ياجماعه وشلون شعوري بذيك اللحظه مهوب معقوله الامل اللي كنت حاطه..والاحلام

اللي كنت مخطط لها تنهدم بلحظه واي لحظه..اخر شي بس اللي هو مابقى الا اني اخطبها واخر شي تنخطب..

من غير شعور طلعت من الماسنجر وركبت سيارتي وانا الدنيا على وسعها ضايقه فيني..اتذكر كل لحظه ..

وكل مره تعاندنا فيها وكل شييي صار لي معها ..جلست ادور بالشوارع لين انهرت وتقفلت الدنيا بوجهي..

رحت البيت وجلست افكر ان كل شي بهالدنيا مكتوب وربي مقدر كل شي .. ومايرد الا القضاء الا الدعاء..

واروح واتوضا واصلي باخر الليل وادعي يارب اذا كنت بسعدها وفيها خير لي وفيني خير لها يارب انها

تكون من نصيبي وتقدرني على هالمسؤوليه واذا فيني شر لها يارب انك تسهل امرها وتوفقها دنيا واخره..

ارتحت بعد ماسويت اللي علي..تعبت نفسيتي اسبوع بس كله يهون دام باقي لي امل عايش عشانه..

دخلت مره الماسنجر وانا ضايق خلقي واشوف الموجودين مين ..والقاها من ضمن اللي اون لاين ..فرحت وضاق

صدري بنفس الوقت ..فرحت اني شفتها وضاق صدري خفت تصدمني بخبر خطبتها..

طفشان says:

السلام عليكم

says:

وعليكم السلام

طفشان says:

كيفك وينك من زمان ؟

says:

بخير .. موجوده بهالدنيا..انت كيفك؟

طفشان says:

انا زي ما انتي شايفه طفشان

طفشان says:

الا على فكره نسيت ابارك لك سمعت انك انخطبتي ..مبروك الله يوفقك اختي

says:

يؤ الاخبار امداها توصلك ماصار شي عشان ينتشر الخبر كان طراطيش حكي وتفركش الموضوع ماله داعي تبارك

طفشان says:

اها..الله يعوضك اخير منه

says:

امين ولو انكم كلكم زي بعض مابكم خير نياهاها

طفشان says:

انطمي ماحد طلب رايك بتاخذين واحد منا غصب عليك مو بكيفك المهم بطلع انا مشغول مالي خلقك باي هع

طبعا يوم قالت لي انه تفركش الموضوع انا الدنيا من كثر منب مبسوط احس انها ميب شايلتني..ويوم قلت

لها باي مشغول من كثر الفرحه طلعت عشان مايضيع علي الوقت ..

واروح لامي واقولها يمه ابيك بموضوع.. واجلس معها ولا ادري وشلون ابدى لها باللي ابيه.. مالفيت ولا

درت ولا شي ..كل اللي قلت له لها يمه يرضيك اني اسافر برى المملكه لحالي؟ قالت لا والله ياوليدي

تعرف رايي بهالموضوع كم مره اقولك منيب راضيه عليك ان رحت الا اذا تزوجت بسلامتك .. قلت لها طيب واللي

يقولك انه لقى بنت الحلال وبيتزوج ويبيك بس تخطبينها له .. اول مره اشوف بعيون امي دموع الفرح ..

وكنها ماصدقتني وتحسبني امزح ..حضنتني ودعت لي من كل قلبها ان الله يسعدني ويوفقني ..وسالتني منهي

البنت ..ومن متى وانت مفكر بهالموضوع ..

قلت لها ان البنت ..تصير بنت خالة واحد من العيال واني اسولف معه مره وقلت له ودي ببنت الحلال..

وذكرها لي وهم عوايل معروفه ومنا وفينا نروح نشوف البنت اذا عجبتني ولا الله يستر عليها ..

تم كل شي وجا اليوم اللي بنروح نشوف البنت فيه.. انا ماكنت مصدق ذيك اللحظه كم سنه وانا احلم بهاليوم

يا رب لك الشكر انك حققت لي هالامنيه .. رحت انا وابوي وامي وخالتي لاهل البنت .. دخلوا هم للحريم وانا

وابوي مع الابو وعياله .. جلس ابوي وابو البنت يسولفون وكل واحد منهم اعجب بالثاني.. جت اللحظه اللي

ماتوقعتها وماستعديت لها .. قال ابو البنت ودك ياوليدي تشوف البنت الحين مره وحده ؟ الراي لك طبعا

اولا واخيرا .. اذا الله قسم لكم نصيب كان بها .. واذا الله ماراد الله يوفق كل بدربه..

انا بديت اتصبب عرق ماستعديت نفسيا وشكليا وكل شي اني بشوفها .. جا ابوي قال ايه يالله خير

البر عاجله .. شوي ويفضى المجلس ولا يبقى الا انا وابوها .. وحنا نحكي لمحت احد دخل علينا بالمجلس

وقال السلام عليكم .. انا بديت احس ان مالي قلب من كثر مايدق.. ورديت السلام وانا الى الحين مارفعت

عيني عشان اشوفها قام الابو وقال عن اذنكم شوي وراجع .. جلست البنت قبالي..رفعت راسي عشان اشوفها..
سبحان الله ماقولكم جمال موب طبيعي مثل كل القصص .. بس كانت احلى بنت في عيني رقه وملح غير اللي معي
بالماسنجر ..سولفنا شوي .. وحسيت انها ماعرفت اني انا اللي معها بالماسنجر.. قلت لها اجل كلنا زي
بعض هاه ؟ ولا فينا خير ونياهاها ؟ ماقدر اوصف لكم وشلون تفاجات انا ساكت ماقلت شي
وكاتم الضحكه ..


وسلامتكم...

قصة روووعه
بس وش صار تزوجوا او لا



( الله يرزقني ببنت الحلال ) (ههههه)

لها تكملة انشاء الله اجيبها بس مهوب اللحين اكملها

ومشكووور اخوي على الرد

والله القصه حمــاس كني جالس اشووف مسرحيه طارق العلي من الضحك

<<<< قررى نص القصه خخخخخخخ

مشكووره قمووره


تحيااتي

وجه سهامك_20

حلوووووووووووه
كمليها بليز

مرررررررررررررررررررررررررررررررررررررررررررررررره حلوه القصه

بليييييييييييييييييييييييييز كمليها ومشكووووووووووووووره

انشاء الله اكملها
ومشكورة بعد عمري على الرد

ياالله عالقصه والله تجنن


ودي اكمل باقي القصة


بليززززززززززززززززززززززززززززز قمورة لا تتاخرين


انا كل يوم بدخل عشانك واشوف القصة


يعطيك العافيه