part : 15
ابعد عنهم ووصل الدرج وماقدر يصبر زياده شاف المكالمات وشاف رقم بيان وخزنه علطول بأسم
( أحلاهم ) وطلع غرفته فـوق وهو يبتسم ويخطط لـ ( للتواصل معها ) ..!
وصل غرفته دخلها كان تعبان مره .. وحتى ملابسه ريحتها ريحة مستشفى وعلاجات ومطهرات ..
خذا بيجامه لونها رصاصي فاتح ومخططه بكحلي ولها أكمام طويله ودخل الحمام يتحمم وهو رايق
ومبسوط لأنه حصل رقم بيـان وخزنه وجلس يقصد وهو يتحمم قصيده له تقول :
والله شاعر ! داخلـي خافـق ٍ ذاب !
أدور اللي ... يستحقه .... ويغليـه !
تعبت ادور بين الاحباب .. أحبـاب !
تعبت أنادي " ياترى وينهم فيـه " !!
الحظ عوّدني على .. قفلـة البـاب !
والعمر يجري بي ولااقدر أجاريـه !
قالوا : ولايسوى الأمل حفنة تـراب !
هو فيه أمل جاني وانا قلت : مابيه !؟
ياهيه ياللي ماخذك عنّـي .. اغيـاب
القلب بعدك ياترى ..... وين اوديه !؟
اليّا متى حنّا مع الناس .... أغراب !؟
والحب .. يدعينا ولااحد ٍ .... يلبّيه !؟
أسألك باللي حط بك سحـر الأهـداب
واللي رسم في مبسمك سالفة تيـه !
ودي نكون بعالم الحب .... أحبـاب
واليا سألتك ( ودك نكون ؟) قل: إيه !
طلع من الحمام وهو لابس بيجامته شعره الرطب متناثر .. رح صوب التسريحه حس وده
يحس بنشوه وأنتعاش خصوصاً وهو يفكر ببيان ويقصـد .. قرب علبه العطر الفخمه من قوتشي
وحط منها وكأنه يتروش فيها .. رجعها مكانه وشعره رطب نشفه شوي ومل من تنشيفه كان
وده يرمي نفسه على السرير حاس بنشوه ويفكر ببيان كثير ..
فكر يرسلها رساله على أساس أنه سلمى وبيشوف رده فعلها الطبيعيه مشتاق لعفويتها كثيييير ..
بس خاف أنها تسأل سلمى وتنفي لها وينفضح ..!
رمى نفسه على السرير وتحت بروده المكيف .. قرب اللحاف منه غطى جسمه كله باللحاف
وتناول جواله وراح لرقم عارفه زيـــن ..!
وصـل رقم بيـان جلس يفكر شلون يوصل لها شلون ممكن يرسل لها .. أو يتواصل معاها ..
هو يعرفها مستحيل تعطيه وجه أو تتقبل منه خصوصاً بعد وهو ولد عمتهـا ..!
هو صريح واللي بداخله كأنه بدأ يعرف وش يعني له .. فتح أنشاء رساله جديده وكتب فيها :
((أعترف لك كان يكفي الاعتراف
واعتذر لك كان يكفيك العذر
في ليالي الشوق حسيت اختلاف
مرت الساعه على روحي شهر
افترشت الهم والضيقة لحاف
فاض بي بركان حبك وانفجر
لاتلوم اللي دخل قلبك وشاف
حب ماشافه بهالدنيا بشر ))
( ضـاري )
( تـم أرسـال الرساله )
بعد ماشاف تم أرسال الرساله رجف قلبه بقوه تمنى لو أنه ماأرسل أو تسرع .. خاف شوي ورجع يقلب بجواله ..
أنتظر رد .. أنتظر شيء للأسف ماوصـله شيء ..
أنتظر وأنتظـر وللآسف دخل في نووووم عميق قبل يوصلـه رد من بيـان ..!
صحى الساعه 7 المغرب .. كان ثقيل رآسه بقـوه .. علطول تناول جواله وشاف للآسف مافيه لارساله ولامكالمه
ولاشيء .. حس بضيقه .. ضاق صدره .. فكر أن بيان تظنه الأن يبي يلعب عليها أو شيء .. حس أنه رمى نفسه
عليها لما أرسل المسج ..!
قام وقبل يقوم من السرير تذكر شيء مهم تناول جواله بسرعه ودق على ساره ..
ضـاري : الو ساره ..
ساره بخقه : هلا وغلا ..
ضـاري : اسمعيني ساره ..
سـاره : امرني ..
ضـاري : اهلي عندكم ..!!
سـاره : لا لسى ماوصلـوا ..
ضـاري بأرتياح : الحمدلله .. طيب شوفي ماابغى اهلي يدرون عن سالفه الانتحار هذي ابد ابد لاتقولون لهم شيء
ابد انا هالحين جايكم ربع ساعه وبجي انتبهوا ..!
سـاره : اوكي ..
ضـاري : وبلغي اشواق بعد اخاف تقول شيء خل تنتبه ترى اهلي مادروا بها ..
سـاره : ان شاء الله ان شاء الله .
ضـاري : يلا فمان الله ..
سـاره : فمان الكريم ..!
قفل منها رمى جواله على السرير وخذا فوطته ودخل الحمام مستعجل وخايف أهله يسبقونه على أشواق ..
تحمم وطلع من الحمام .. صلى فروضه .. ولبس ثوب وغتره وتناول عطره من دولتشي جابانا وحط منه بشكل كثييييير
لين تحمم تقريباً بالعطر .. وخذا سبحته السوداء اللي على الدرج وجواله وبوكه .. وطلع من الغرفه ..
نزل تحت شـاف أهله مب فيه ..
ضـاري : ايييييييييه هالحين رايحين للبنت اللي يستر خل ألحقهم لايصير شيء ..
وطلع مع الباب وهو مستعجل بشكله اللي كأنه عريس بغترته وثوبه وسبحته الفخمه ..!
وصل المستشفى ..
دخل المستشفى وهو يمشي بالسيب سمع نغمه رساله .. أنتفض قلبه بسرعه .. وقف وطلع جواله ..
من كثر ماهو مستعجل كان يبي يفتح القفل حق الجوال عجز يخطي فيه رفع رآسه فوق أبتسم لشكله وربشته
أول مره يحس بالشعور هذا .. تذكر كيف معجباته لما يكلمونه ويقولون ننقز ونفرح لما يوصلنا مسج منك
وكيف هو الآن يمر بنفس الشعـور ..
فتح الرسـاله وكانت :
((هلا ضـاري ماله داعي تعتذر اتوقع ذيك السالفه انتهت بالمره انا استغربت وش جاب رقمي لك
بس تذكرت مقلبكم اليوم توقعت ان البنات مسحوا الرقم بس يمكن نسوا لذلك انت امسحه واسفه
على التأخير كنت نايمه .. ))
بيـان ..
رجع يقرأها مره / مرتين / ثلاث ..
ركز على كل كلمه .. اسلوبها معاه بالرساله جاف جداً .. يختلف عن اسلوبها لما شافها وسولف معاها
وزعلوا وتعشـوا مع بعض .. كان يمشي صوب غرفه أشواق والبنات وهو يقرأ الرساله ويعيد ويكرر
وباله مشغول يفكر ببيـان ..
وصل الغرفه وقبل يدخلها راح أنشاء رساله جديده وكتب :
((ههههههههه وش دعوه يمسحونه صراحه انا كنت مستعجل وقالوا لي امسحه بس حبيت اعتذر قبل
قلت يمكن شايله بخاطرك وجعله نوم العوافي واسف على الازعاج .. ))
دخل جواله بجيبه ومسك سبحته بشموخ وطق باب غرفه بنات عمه ..
الجميع : ادخلللل ..
تنحنح ودخل ضـاري بهيبته .. والسبحه معاه والغتره والكشخه وكانت تسبقه ريحة العطور اللي كانت تملىء
الجو عليهم ..
ضـاري : السلام عليكم ..
الجميع : عليكم السلام ..
أشواق تراقب ضاري بنظرات حب وهيام وهي تبتسم وتحس أنها خلاص لها وتذكرت كيف هاليدين اللي ماسكه
السبحه بكل رجوله اليوم كانت حاضنتها ..
ضـاري : هاه كيف الصبايا اليوم ..؟!
البنات كلهم : الحمدلله / تمام / بخير طيبين ..
ضـاري : دوم ان شاء الله .. شده وتزول ..
أبوه : الحمدلله طيبين ونبي نشوف الدكتور بعد شوي ونشوف وش عنده يبينا ..
ضاري ناظر لأشواق بعينه وكأنه يسألها عرفوا .. ناظرته أشواق من وراء الغطوه كان ودها تصرخ تقول لااااا ماحد
يعرف عن دنياي غيرك بس للأسف بينهم حاجز وهو الغطـوه ..
ضـاري : خير ان شاء الله ..
وهو يسولفون سحب ممدوح ولد عم ضاري كرسي لضاري اللي كان واقف شوي بعيد وحطه له ..
ممدوح : اجلس ياباشا ..
ضاري :ههههههههههه تعيش ياملك هههههههههههههههههه ..
صفوق يناظر محمد : ماودك تكفخهم يتغزلون في بعض ..؟!
محمد : ههههههههههههههههههههههههههههه الا ..
كان الكرسي اللي حطه قريب من أشواق اللي كانت سلمى والعنود ويسرى جالسين على سريرها
وضاري مايبعد ميترات عنهم ووجهه لأشواق وظهره للجدار وراه ..
وصلت ضاري رساله وكانوا مشغولين بالسوالف الا أشواق .. أوجعها قلبها .. ذولي المعجبات .. ذولي بنات أبليس
يبون يأخذونه مني .. بس لااااااا خلاص .. ماراح أسمح لهم .. يكفي تنازل .. يبوني أتركه بعد ماشميت ريحته من قريب
وعشت بأحضانه .. مستحييييييييييييييل ..
فتح ضاري جواله وهو باين عليه أنه ملهوف يشوف وش بالرساله .. وفتحها بأستعجال وهو يبتسم ..
كانت من بيـان مكتوب :
(( عذرك وصل وامسح رقمي خلاص وبعدين وشو نوم العوافي قمت من النوم ههههههههه يلا مع
السلامه ))
تبسم غصب عنه كانت واضحه عليه الفرحه عض على شفته بقوووووه وهو يبتسم . . عفويتها لما قالت خلاص صحيت
ومع السلامه وبساطتها .. عض على شفته مره ثانيه ورفع رآسه يناظر أهله ورجع للجوال .. كان رافع حاجب من حواجبه
ويبتسم بخقـه وراح أنشاء رساله جديده وكتب :
(( اوه العذر ياست بيان هههههههههههههههه صح النوم قصدي وفمان الله )) بعدين رجع مسح فمان الله مابغى يختم الرسايل
بينم لانه حس أنه لو كتب فمان الله ماراح ترد عليه مسحها وأرسل :
(( اوه العذر ياست بيان هههههههههههههههه صح النوم قصدي )) .. تم أرساله الرساله .. نزل جواله بحضنه ورفع يناظرهم
وهو واضح باله مشغول مو معاهم ..
أشواق حست غصه بقلبها .. البنات بيأخذون ضاري منها وهي واقفه تتفرج ..! تشوفه يبتسم وعايش بخيـال مع غيرها
تذكرت يحته وحضنه وحنانه ويدها على شعره .. كيف ممكن تجي أنثى غيرها وتخطف كل شيء منها ويصير ضاري لها بلحالها ..!
أبومحمد: هه يلا انتهت الزياره ياضاري خذ اهلك وانا ابروح للدكتور واجي عقب الحقكم ..
ضاري أرتبك : هاه لا خلهم يروحون مع صفوق ومحمد وانا بروح معاك للدكتور ..
صفوق : بالله ..؟ لاتروح حنا نروح معاه وانت ود اهلي ..
ضاري يتأفف وهو مرتبك : اقول الخلا خلاص انا بروح مع ابوي يلا يبه ..
أبوه : يلا مشينا ..
طلع ضاري قبل يطلع التفت لأشواق وناظرها وكأنه يقولها لاتخافين كل شيء تمـام .. وسلموا عليها البنات وسلموا على بنات
عمهم وطلعوا من المستشفى ..
وصلوا لغرفه الدكتور ..
ضـاري سبق أبوه : لحظه يبه خل أدخل عليه أشيك وعقب أناديك..
الأب بجهل : ميخالف يلا وانا ابوك ادخل ..
طق الباب ضاري ودخل ..
ضـاري وهو يلعب بسبحته بتوتر : السلام عليكم ..
الدكتور : وعليكم السلام اهلاً وقام صافحه ..
ضـاري : كيف حالك دكتور ان شاء الله تمام ..؟!
الدكتور : الحمدلله ..
ضـاري بأرتباك : دكتور هذا الوالد معي وهو ولي أمر أشواق جبته حسب ماطلبت بس عندي طلب صغير ياليت تنفذه ..
الدكتور وهو منزل رآسه يحوس بالأوراق : خير ان شاء الله ..؟!
ضـاري : مابيك تقول للوالد غير ان كل شيء صار بسبب الحادث وبس ! لان الوالد كبير بالسن وضغط وسكر اخاف يصير
له شيء لاسمع مثل هالخبر تعرف شيء مو هين وهذي بنت اخوه ..
الدكتـور : بس صعبه لازم يعرف حالتها كامله لانه لو لاقدر الله بعد العمليه اكتشفنا حاجه راح تكون مسؤوليتي أني خبيت
عليه الكلام ده ..!
ضـاري : لاتخاف أنا بقولهم أنا طلبت منك ولو تبي أوقع على اوراق بمسؤوليتي وقعت .. هاه شقلت بسرعه الوالد ينتظر
برا ومابيه يشك بشيء ..؟!
الدكتور بتفهم : خلاص ان شاء الله خليه يتفضل وكل شيء حيكون تمام ..
ضـاري يناظر الدكتور بأمتنان : الف الف شكر ماقصـرت .. يلا بناديه ..!
طلع ضاري حصل أبوه جالس على الكرسي قدام غرفه الدكتور وينتظره ..
أبومحمد : هه ضاري وين رحت ..؟
ضـاري : لا بس عبيت له بعض البيانات يلا تفضـل ..
ابومحمد : يلا بسم الله وقام من الكرسي ودخل عند الدكتـور..
أبومحمد وضاري : السلام عليكم ..
الدكتور وهو يوقف ويصافح أبومحمد : اهلاً وسهلاً تفضل ..
ابومحمد وهو يجلس : زاد فضلك .. هاه ياوليدي وش هو صاير يقولون انكم تبوني ..؟
الدكتور : كل خير ان شاء الله .. الموضوع بسيط جداً ومحتاجين نعمل عمليه لأشواق وبدنا موافقتك ..
ضاري يناظر لأبوه بأرتباك وخوف عليه ..
لف ابومحمد على ضاري : وش عمليته ..؟! ثم ناظر الدكتور : تقولون طيبه وش عمليته ..؟!
الدكتور : انت عارف اثار الحادث وكذا والرحم عندها مجروح كثير وللآسف هي فقدت غشاء البكاره بسببه ولازم
نعمل لها عمليه علشان النزيف يتوقف ..!
ابومحمد ناظر الدكتور بسرعه : فقدت غشاء البكاره ..؟!!!! ماهو كلامكم هذا اول ؟؟؟ وش مسوين لبنيتي هاه ..؟؟؟
ضاري خاف على ابوه : يبه استرح لاتعصب الامر سهل وان شاء الله ماهنا الا الخير اهم شيء سلامتها وصحتها والباقي
يتعوض ومثل هالامور دايم تصير عقب الحوادث ..
ابومحمد : بس ماقالوا لنا من اول ..؟؟؟ هذا موضوع ماهو سهل ؟؟؟
ضـاري بقل حيله وخوف : المشكى لله .. النزيف ماحصل الا امس ولازم تصير العمليه بأسرع وقت ..!
ابومحمد : واشواق تدري ؟؟؟؟!!
ضـاري : لاطبعاً وماراح تدري نفسيتها ميب ناقصه عقب العمليه نقولها وان شاء الله الامور تمام ..
ابومحمد وهو واضح مو مصدقهم : لااله الا الله لااله الا الله هات هات الاوراق خلنا نوقع ونطلع ونخلص ..
ضاري لاحظ ان ابوه تعب وأنغث فقال بسرعه : لاتخاف يبه كل شيء تمام لاتخاف ..!
ابومحمد وهو يوقع الورقه بتعب وحزن : هذي بنيته الغالي وماودي يصير لها شيء هذي وصاه عمك وانا ابوك قبل يموت موصي
عليها هذي ضناه وريحته .. امي ماتت ولاهي جايبة لنا اخو ثاني والباقي لنا من ريحته اشواق ..
ضـاري بتأثر : لها ولك طولة العمر ان شاء الله .. تساهيل تساهيل ان شاء الله لاتخاف ..
وقع أبومحمد وهو خايف وطلع وماكمل مشيه وجلس على الكرسي وحط شماغه بوسط عيونه وجلس يمسح دموعه اللي
خالطتها عبره الشيب اللي غطى وجهه ورآسه وشعره .. حزين على بنت أخوه وعلى اللي صار لها وتذكر أخوه ووصيته له ..
أشواق يمكن اغلى من بناته .. قطعه من ريحة اخوه اللي بقالهم عقبه في هالدنيا ..
ضـاري تأثر وجلس بجنب ابوه وحب رآسه : وحد الله يالغالي ماهنا الا الخير وش بلاك متضايق ..؟
ابومحمد : ياوليدي هذي بنية الغالي وش صار لها .. ماهو حادث ولاخرابيط حادث ماقالوا لنا من اول وش سوو بها الله العالم ..
ضـاري بحرقة قلب : وش دعوى يالغالي ماهو من مصلحتهم يكذبون .. امر الله هذا ومقدر ومكتوب ..
ابومحمد : ياوليدي انا افكر لباتسر كلام الناس مايرحم والبنت توها مااعرست ماهم قايلين حادث والا ماهو حادث ..؟!
ضـاري أنقهر : يبه ..! وش هالكلام .. العمليه تبي تحل كل شيء .. والرجال اللي ماهو متفهم وضع مثل هالحالات ماهو
رجال والله لايحيه ..!
أبومحمد : خوش والله اجل تجلس طول العمر بنت ..!
ضـاري بأبتسامه : لاماتجلس ان شاء الله .. كل هذا نصيب واهم شيء صحتها وعقب يصير خير يلا مشينا بس خل عنك
وساويس ابليس ..
أبو محمد قبل يقوم مسك يد ضاري : ضاري ..
ضاري وهو يجلس مره ثانيه ويلتفت لأبوه : سم يالغالي ..؟!
أبومحمد : ياوليدي هذي بنت عمك امانة برقبتك لاصار لي شيء .. مالها غيرنا في هالدنيا تطالع الله ثم تطالعنا وانت بالذات
اخوانك عندهم بيوت وحريم وعيال ومسؤوليات .. الله الله فيها تراها من ريحة ثيابي وثياب عمك الله الله ياوليدي هذي لحمك
ودمك وعرضك ..
ضـاري يبتسم بألم وهو يناظر أبوه : الله يهداك بس لاتوصي حريص أشواق بعيوني وعيونك والله يعطيك طولة العمر
وتربي عيال عيالها بعد ..
ومسك يد أبوه وطلع فيه برا المستشفى وهو يفكر هل ياترى تنجح خطته ويكون الموضوع من الحادث وينتهي هالأمر ..؟ والا تبدى
مصيبه جديده وسط حزن قطع قلب أبوه وقطعه وتكون أشواق هي السهم اللي صاب عذريه شرفهم ..!
وصل البيت ونزل أبوه بطريقه للمسجد وهو كمل للبيت يبي يتوضأ همن يروح يصلي ..
دخل البيت شاف خواته وحريم أخوانه بالصاله وعندهم عيالهم وأمهم ..
ضـاري : السلام عليكم ..
الكل : عليكم السلام ..
ضاري وهو يجلس على الكنب : شخباركم كلكم نفر نفر هههه ..؟
الكل : تمام / الحمدلله / بخير ..
ضاري وهو يتنهد ويلعب بسبحته : ابي فنجال قهوه ..
العنود : ابشر ليه مصدع هههههههههههههههه ..؟
ضاري وهو يشيل شماغه عنه ويرميه بجنبه على الكنب ويحك شعره : اي والله بالحيل ..
جلس يتقهوى ويتسمع لسواليف خواته ويناظر للتلفزيون اللي جالسين عنده بزارين اخوانه ويلعبون لاهموم ولامشاكل ..
قبل ينزل فنجاله سمع صوت جواله يرن ..
ضـاري : خير ..؟ وطلع جواله من مخباه وشاف رقم سـاره ..! أستغرب ..! وش عندها .. داقه ذا الوقت ..! وش تبي ..؟!
نزل جواله وحطه صامت وكمل يتقهوى ..
سلمى وهي ترفع حواجبها : ليه مارديت ..؟
ضاري ناظرها بأبتسامه خبيثه : هذي مرتي بالرياض مشتاقه لي مووووووتي قهر..
سلمى : ههههههههههههههههههههههههه سمعتي يمه ولاصارت مرتك ليه مارديت ..؟
ضـاري : الصراحه اخاف اجيب العيد قدامكم هههههههههههههههههههه
يسرى : هههههههههههههههههههههههههههههههههههههه بعد تعترف شفتي ولدك يمه ..
ام محمد وهي تناظره : انت صادز ..؟!
ضاري : ههههههههههههههههههههههههههههههههههههه افا لعبوا بعقلك ياميمتي انا اعرس وادخل على مرتي وانتي مانتي
جنبي الله لايقوله بس والله ماامسك يد عروستي الا يدك بكفي الثانيه يالغاليه ..
سلمى : اجل انت تسذوب ههههههههههههههههههههههههههههههههههههه
ضاري : انت شب بس ولاكلمه الخلا ..
رجع الجوال يدق مره ثانيه .. رفع ضاري حاجب واحد من حواجبه وهو يناظر الرقم ..؟! شعندها داقه هالحزه ..؟!
مسك جواله وقام طلع برا عن اهله ورد ..
ضاري : هلا ..
أشواق بحياء : هلا وغلا ..
ضاري وهو يرفع حواجبه ويطير عيونه : اشواق ..!!!!
أشواق بحياء : هلا ..؟!
ضاري : عسى ماشـر ..؟! فيك شيء ..؟!
أشواق : لامافيني شيء بس طفشانه وحابه أفضفض وأسولف أحس اني متضايقه ..؟!
ضـاري بشك : خير !! وش فيك ..؟!
أشواق تحاول تصنع البكي علشان تكسر خاطره : تعبت ضقت من المستشفى والعلاجات .. ابي امي وابوي
ابي احد يجلس معي ابي اسولف وافضفض ..
ضاري : وين البنات عنك ..؟ منتي عندهم ..؟
أشواق : لا بلحالي بس وقت الزياره يخلوني عندهم علشان نكون بغرفه وحده وبعدين يطلعوني لحالي ..؟!
ضـاري وهو يتنهـد :اهااااااااااا طب عسى ماشر قولي لي وش فيك وش مضايقك ..؟!
أشواق : كل شيء .. ضاري ..
ضـاري : سّمي ..
أشواق : ماتقدر تجي هالحين عندي .. ودي افضفض ..
ضاري رفع حاجبه بأستغراب : وين اجي ممنوعه الزياره ..؟!
أشواق : طيب انت تجي بغير اوقات الزياره ساره تدخلك تعال ..!
ضـاري بتعب وطفش : مقدر تعبان اليوم وانتي الحمدلله شفتك طيبه وماعندك الا العافيه ..
أشواق بآلم حست أنها ثقلت عليه : اها اوكي اسفه على الازعاج توصيني شيء قبل اقفل ..!
ضاري رحمها فقال : اشواق ..؟!
أشواق بعذاب وحب وألم : هلااا ..
ضـاري : انتظريني شوي وبجيك ..
أشواق بفرحه نزلت دمعتها .. يالله شلون هالانسان مخلوق .. محترم حساس متفهم رومانسي مايكسر خاطر احد ..
رغم انه رجال وله هيبه وشموخ الا انه داخله طفل .. انسااااان قليل تلقى مثله ..
قالت بفرحه : صدق ..؟!
ضـاري : اي والله بس اخلص بعض الشغل وامرك ..؟!
أشواق : الله يخليك يارب يلا اجل مع السلامه ..
ضاري وهو يرجع للصاله : فمان الله ..
قفل منها وجلس يفكر فيه شك يخالجه من وقت لثاني .. ياترى وش تبي أشواق وليش صايره كذا ووش سبب بكائها ..
أشياء كثيره تدخل مخه وتطلع ..وصل الصاله ..
ضـاري بصوت خشن : ياعرب .. أأدخل ههههههههههههههههههههههه ..؟
سلمى : نعم يافتى ادخل ..
ضاري : فتى بعينتس والله كل هالطول والعرض والشوارب وفتى ..؟!
سلمى : خلاص لاتزعل ياشايب ههههههههههههههههههه ..
ضاري وهو يأخذ شماغه : اش بس ماعندتس ذوق ..
العنود : هههههههههههههههههههههههههه احلى ياواثق ..
ضاري : اييييه والتفت ليسرى وقال وهو يضحك : وانتي بس مقابلتنا ماعندتس رجل ماعندتس بيت لعنبودارتس عبري
رجلتس خلكم رومانسيات يالسعوديات شوي تعلموووووووووووووووا ..
البنات كلهم : من زينكم انتم / يالضبان / وععععععععع / شف من يتكلم ..!
ضـاري وهو يناظرهم بأستغراب :ههههههههههههههههههههههههههه اهب اهب ياقو الحريم يلا سلام لاتأكلوني ..
وطلع وصعد فوق لغرفته وهو ماسك شماغه بيده وجواله بيده الثانيه ..
وصل غرفته .. دخل غرفته حس أنه محتاج يرتاح شوي .. رمى شماغه على السرير .. شغل المكيف .. وتوضأ وصلى بغرفته
كان تعبان جداً وماقدر يروح المستشفى .. خلص وانسدح بثوبه على سريره ..
وجلس يفكر بأشواق وتعبها وكلام الدكتور وكلام ابوه ومرات تجي على باله بيان ويبتسم ويناظر رسايلها ويتخيل شكلها وهي
تقول هالكلام له بوجهه ..
خذاه النوم وغفى على ملابسه ونسى أنه مواعد أشواق يروح لها وهي تنتظره بالمستشفى ..
اشواق كانت تنتظر بالمستشفى .. انتظرت ضاري وانتظرت بس ماش للأسف ..
صارت الساعه 9 .. 9 ونص .. 10 .. وضاري ماجاء .. جلست تدق عليه من جوال ساره وتبكي ..
تدق تدق ليييييييييييييين ينفصـل وللآسف محد يشيله ..وبعدين صار يعطي مغلق ..!
جلست تبكي أكثر وأكثر ..
مهيب قادره تتهنى بولد عمها اللي تحبه وتموت عليه .. حتى هو مو معبرها .. رغم حبها وخوفها عليه .. بالأول واعدها يجيها
وماجاء بعدين صار مايرد وبالأخير قفل جواله عن مكالماتها ..
دقت دقت وأرسلت وللآسف ماجاء رد منه ولاخبر ..
رمت الجوال بعيد عنها وجلست تبكي وتضم نفسها وتتذكر لما ضمها ضاري وتتذكر ريحته .. رفعت رآسها وصارت تتخيل أن
ضاري موجود عندها ويفكر فيها ويعبرها ويضمها .. أنسدحت على سريرها وضمت بطانيتها وجلست تتكلم وكأنها تكلم ضاري
وتضحك معه وتقوله خلاص لاتزعل أحبك وأموت فيك .. وتتكلم وتسولف وتشكي .. وتبكي ومنهاره .. وتفكر بالبنات وأنهم
بجرأتهم وقوتهم خذوا ضاري القريب منها ..
الساعه 11 ..
تقلب ضاري على السرير وحس بنفسه .. الغرفه بارده جداً وثوبه مب قادر يأخذ راحته فيه بالنوم ..
تحرك وحس جسمه مفكك .. ناظر حواليه شاف الغرفه ظلمااااء .. تحسس جواله مالقاه حوله ..
شغل النور .. شاف ساعته ..
ضـاري : اوووووووف 11 .. ياووووك ياهي راحت علي نووووومه ..
دور جواله على السرير رفع مخدته .. شاف جواله مرمي هناك طالع طرف منه تحت شماغه المرمي برضو على السرير ..
تناول جواله وحركه شافه قافل .. حاول يفتحه ماقدر ..
ضاري : اووووه مخلص شحن .. شبكه بالشاحن .. وتناول فوطته وطلع قميص رجالي لونه رصاصي ومخطط بزيتي ..
شكله شيك مره وهادي .. ودخل الحمام يأخذ له دش ..
طلع من الحمام .. لبس القميص .. كان شكله طالع روووووووعه .. خقق من جد .. نشف شعره بالفوطه بشكل سريع
ناظر بنفسه بالمرايه وقال وهو يرتب شعره : والله طويل يبي له قص شوي ..
نشفه بالفوطه وحط عليه شوي جل وتناول بودره حلوه وحط منها على رقبته وذقنه .. وماحط عطر .. ريحتة البودره
بلحالها تكفي ..لبس ساعته وتناول بوكه وحطه بمخباه .. وفصل جواله من الشاحن .. وطلع من غرفته ..
وفتح جواله وهو نازل تحت ..
أول مافتحه شاف مكالمات ورسايل بالهبل .. طارت عيونه يالله .. كل ذي رسايل ومكالمات أعوووووذ بالله ..
شاف المكالمات لقى 37 مكالمه من أشـواق وتذككككككر انه كان يبي يروح لها ..
ضاري وهو ينزل مع الدرج : اوووووووووووووووووووووووووووووووووووووووف نسيت يالله هالحين تحسبني
ازحلقها .. يالله .. الله يلعن ابليس ..
فتح الرسايل شاف 5 كلهم من أشواق برضـو .. كانوا :
1- (( وينـك ..؟! )) ..
2- (( تأخرت يلا ماصار شوي ..!! )) ..
3- (( ضاري تبي تجي والا لا ..؟! ))
4- (( ضاري وش فيك عسى ماشر ..! ))
5- (( على الاقل حس فيني ..؟ قول لي ماني جاي ..؟ الله يسامحك .. وانا اسفه على ازعاجك ))
رفع حاجبه بتأفف وقال : هييييي علينا ..؟ راحت نومه ياخي .. ناظر ساعته كانت 11 ونص ..
خل ارسل لها رساله علشان ترتاح ..
كتب لها مسج :
(( سلام ..خلاص ولايهمك الحر عند وعده بس اتعشى واجيك ان شاء الله ))
بدون مايحس بنفسه دور بالاسماء ووصل لـ (( أحلاهم )) وأرسل الرساله ( تم أرسال الرساله ) ..
ماحس بخطأه ولاشيء دخل جواله بجيبه ونزل للصاله وسمع صوت أهله هناك ..
ضاري وهو يدخل : سلامو ..
الكل : هلا والله ..
صفوق : صح النوم اعوذ بالله ياشيخ انت ونومك الخايس تعدل مثل العالم ..
ضاري يناظره بأبتسامه : اقووووول تكفى لاتفتح علي باب ويناظر امه ومحمد ..
صفوق بخبث : لاصحيح والله ..
ضاري يناظره : هوووووووووه علينا تكفى روقنا ..
صفوق : هههههههههههههههههههههههههههههههههههههههه ..
محمد وهو يشيل بنته يبي يطلع ووراه زوجته : لاهو صادز .. ياخي نم مثل العالم والناس ماهو لاصاروا الناس
تبي تنام صحيت انت ..؟!
صفوق بخبث : ههههههههههههههههه اي والله صدز ..
ضاري يناظر محمد وصفوق : اقول روقني انت وياه ابنام على راحتي ماوراي شيء ..
محمد : ليه ماوراك ..؟! ياخي نم ارتاح ..؟! يعني حنا ننام علشان ورانا شيء ..
صفوق : هههههههههههههههههههههههههههههههههههههههههههههه هههههههههههههههههههههههههههههههههههه
ضاري يناظر له بخبث : عجبتك هاه ..؟ ايه وراكم ونص ههههههههههههههههههههههههههههههههههههههههههههه
والله لولا بعض الناس يأشر بحواجبه على زوجه محمد كان علوم ..
صفوق :ههههههههههههههه استح ياولد ..
ضاري : ولد بعينك استحوا انتم ..
محمد : محد قالك لاتعرس ياخي اعرس وفكنا ههههه ..
صفوق بخبث : لا لا ماهو زين العرس لاتعرس ويناظر مرته قصدي زين زين ههههههههههههههههههههههههههه ..
ضاري يناظر لصفوق : ههههههههههههههههههههههههههههههههههههههههههه افا بس راحت الرجال تخاف من زوجتك
يالجبان وقال ايش قال ماهو زين العرس خل عنك بس زين ونص بس اصبروا علي ..
محمد : ههههههههههههههههههههههه حشرك ياصفوق هههههههههههههههههههههههههههههههههههههههه
صفوق يناظرهم : اهم شيء رضاء ربي ثم الوالدين ثم المدام هههههههههههههههههههههههههههههههههههههههههههههه
ضاري : هههههههههههههههههههههههههههههههههههههههههههههههههه ههههههههههههه زين قلت الوالدين ..
محمد : هههههههههههههههههههههههههههههههههههههههههههههههههه هههههههه وغمز بعينه لضاري وقال : ههههههههههه
يدور الرضاء ابو الشباب ..
ضاري : ههههههههههههههههه ملاحظ انت وقدام الله وخلقه ..
محمد : يلا بس ابطلع اوجعني ظهري وانا واقف سلام ..
ضاري بخبث : اوجعك ظهرك اجل ههههههههههههههههه ..
صفوق وهو يطلع بعد : وانا لاتتوحد فيني يلا سلام .. وطلع وهو يضحك ..
ضاري التفت شاف خواته جالسين ويضحكون على كلامهم ..
ضاري : يسرى ولعنه ..
يسرى : هلا ..
ضاري : ليه ماتطسين لرجلتس ..!
يسرى : هههههههههههههههههههههههههه مابيه ابجلس عندكم ..
ضاري يناظرها بنص عين : ههههههههههههههههه جتنا الثانيه هين بس والله دربك درب اخوانك مهايط والا تموتين بترابه ..
يسرى : ههههههههههه اكيد رجلي ..
ضاري : ولاصار رجلتس وين تبين هنا روحي له ليه معرس على الهواء هو ..؟
يسرى : هههههههههههههه كش مستلم اليوم وبنام هنا وش صار يعني ..
ضاري : اهاااااااا طيب الله لايهينك قومي حطي لي عشاء ..
يسرى : وهذولي ليش مايقمن .. وتأشر على سلمى والعنود يتابعون مسلسل ..
ضاري : يتابعون المساكين ..
يسرى : ياعيني على الرحمه طيب طيب بقوم وامري لله ..
ضاري : هههههههههههههههههههههههههههههههههههههههه كفو اختي ..
حطت له العشاء وتعشى وطلع للمستشفى يبي يروح لأشـواق ..!
وصل المستشفى دق على سـاره ..
ضـاري : الو ..
ساره : هلا والله ..
ضاري : اهلين شلونك ..؟
ساره بخقه : طيبه انت كيفك ..؟
ضاري : طيب بخير .. الا بسألك اشواق صاحيه ..؟ ابجي دخليني عليها ..!
ساره: اي صاحيه بس منهاره وتبكي مدري وش بها ..
ضاري : اييييييييييي راحت علي نومه طيب طيب يلا دخليني انا عند الباب ..
ساره : اوكي يلا ..
قفل منها وراحت له ساره وشافته واقف عند الباب على قميص وشعره وشكله الجذاب اللي مايتغير ..
خقت عليه ناظرت الساعه 12 كانت ..
راحت صوبه .. وناظرته بعيونها شافها وعرفها ودخل ..
ضاري : سلامو .. هاه يلا ..
ساره : اهلين .. هههههههههههه مستعجل ..
ضاري : هههههههههههههههههههههههههه اخاف تنتحر بعد ..
ساره حست ضاري رايق ومب مثل دايم وودها تسولف معاه : ههههههههههههههههه لاتخاف ماطلعتها من غرفتها ..
ضاري ناظرها بأبتسامه تذوب الصخر وعض على شفته وقال : شاااااطره ..
ومشوا صوب غرفه أشواق .. وصلوا عندها ..
ساره : ضاري الساعه 12 لاتطول الساعه 1 يجي الدكتور يشيك ..
ضـاري يناظرها : لاتخافين دقايق بس اشوف وش عندها ..
ساره مشت وخلته وهو فتح باب الغرفه .. وكانت ظلام ومافيها صـوت ابد ..
أشواق شمت ريحه مميزه جداً تعرفها ريحه بودره الجسم الخاصه بضاري .. حست بروحها ردت .. حست بشيء بارد يمشي
بأطرافها .. مثل الطفل لما تضربه ويبكي وينتظر أحد يجي يراضيه ويفرح لأي شخص يفتح الباب يراضيه ..
دخل للغرفه .. ناظر شاف صدر أشواق بس هو اللي يتحرك يرتفع وينزل من البكي .. ولافه جسمها على بعض وضامه البطانيه
وتعض على شفايفها بقوه ودموعها تصب ..
شافته ناظرته وقالت بصوت مخنوق : تلعب علي ..!
قرب لها ضاري كسرت خاطره وقالها : لاوالله مالعبت بس راحت علي نومه وقلت لك بجي ..
اشواق وهي تبكي : ماجييييييييييت ماجيييييييييييييييت متى نمت متى ..؟!!!!
ضاري : والله راحت علي نومه نمت وتوي هه صحيت وجيتك ركض ..! العذر الصبح مانمت كويس كنت عندك ..
أشواق : لو كنت نايم ماتقفل جوالك بوجهي ..!!
ضاري قرب لها أكثر وقال وهو فوق رآسها : هو قفل من نفسه الشحن فضى وشوفي هه مافيه الان الا بطاريتين بس ماامداني
اشحنه فل جيتك ..!
أشواق سكتت وكملت بكي .. ناظرها ضاري شافها وتذكر كلام أبوه الصبح : هي لحمك ودمك وعرضك وبنت عمك ..!
رفع رآسه فوق كأنه يحس بشيء يخنقه من داخل شهامته ونخوته تتحرك ..
ناظرها وقال : خلاص لاتبكين .. أنا اسف حقك علي .. خلاص عاد .. وربي وربي كنت نايم اسألي البنات .. وجوالي
قفل .. ولما صحيت جيت يعني وش يخليني أكذب عليك مثلاً ..؟!
أشواق ماردت عليه وجلست تبكي .. نزل رآسه لها لين وصل لين وجهها وقرب أصبعه الأبهام ومسح دموعها اللي تصب وماأمداه
يرفع أصبعه لأنها طاحت على يده وبككككككت بكل قوتها وصارت يد ضاري تحتها على صدرها وهي تبكي ..
حاول يكلمها يسكتها بس مارضت .. قام وحركها من كتفها وشالها وعدلها وقالها : خلاص اشواق انا ماجيتك تبكين ..! انا اعتذرت
لك وقلت لك كنت تعبان ومانمت كنت عندك هنا ورحت خذاني النوم وغفيت .. ويوم صحيت جيت لك شوفي الساعه كم
ترى ماأقدر أطول الدكتور بيجي بعد شوي .. لذلك يكفي بكي .. ناظريني قولي وش بخاطرك ..!
ناظرته وهي تبكي وقالت : ليش ماقلت لي بنام تعبان .. على الاقل ماأنتظر أكثر من 3 أو 4 ساعات ..
ضـاري بتعب : ماكنت ادري اني بنام ولاكان عندي طاري نوم التعب كسر ظهري ونمت بغفله ..
ناظرته أشواق وكملت بكي وهي تتلذذ بأسفه وأعتذاره وقربه منها ..
رفع رآسه وتأفف .. وقال : أوكي شكلك ماودك تصدقين أنا منب مجبور أكذب .. أنا بطلع منب جاي علشان أوقف ساكت
وانتي تبكين .. يلا عن أذنك مع السـلامه ..
وقبل يطـلع قالت اشواق بصوت مبحوح : ضااااااااري ..
لف لها شافها تبكي ناظرها ورفع حواجبه وأشر لها برأسه وكأنه يسألها وش تبي ..؟!
أشواق : تعاااال انا تعبانه .. لاتخليني .. لاتوصل هنا وتبعــد ..!
رجع لها وسحب كرسي وجلس قبالها وقال : اجل اسكتي بلاش بكي ومناحات ماصـار شيء !!
رفعت رأسها ومسحت دموعها بكمومها وأبتسمت .. ناظر ضاري حوله ماشاف مناديل على الطاوله .. دخل يده بجيبه
وطلع مناديل وطلع جواله معاها .. مد لها المنديل .. خذته من يده وهي تبتسم حطت المنديل على عيونها تبي تمسحهم بس شمممت
المنديييييييييل بقووووه ريحة ضاري حتى في المنديل لاصقه .. كأنها تشم ضاري ماتشم منديل في جيبه .. شمته وهي تناظره وتقول
في خاطرها " ليتني منديل في جيبك " .. شافت شعره واضح أنه رطب شكله حلوووووو وفوق الحلو حنانه يحليه أكثر ..
حسدت المعجبات عليه .. أكيد هم يحسدونها الان لانها بنت عمه وقريبه منه وعايشه معه بنفس البيت وتشوفه بس هم مايدرون أنها
تتعذب ألف مره مايدرون أنها تتمنى تصير معجبه على الاقل تسمع صوته وكلامه الحلو كل ليله .. تسمع غزله وعبارات الحب منه حتى
لو كانت كذب ولعب وطيش ..
ناظرها ضاري بأبتسامه : تبين مويـا ..!
ناظرته وقالت بخقـه : ايه ..
قام من الكرسي وخذا جواله : طيب بروح أجيب لك مويا وعصيـرات ومناديل وبجي .. أوكي ..؟!
أشواق ناظرت جواله وطرت عليها فكره خبيثه فقالت بخبث : أوكي .. بس أخاف تروح وماتجي ..؟!
ضـاري ناظرها : اوووه وبعدين ..!
أشواق بأبتسامه : طيب خل جوالك عندي ضمان على الطاوله علشان أضمن أنك ترجع ..
أبتسم ضاري حس أنها طفله ومادرى أن وراها مخططات وقال : أوكي وهذا جوالي ونزلناه يلا .. بروح وبجي ..
طلع مع الباب قامت وجلست على السرير ومسحت دموعها بقوه وتناولت الجوال وفتحته .. خافت يكون فيه رمز قفل بس
اشوى ماكان فيه .. فتحت وراحت علطول للرسايل ..
تبي تشـوف وش موجـود ..؟ وش مرسل ..؟ مين أرسله .. تبي تعرف مين كان مشغول معه المغـرب ..؟!
راحت أول شيء للبريـد الوارد .. شافت رسايلها والرقم مسجل بأسم ساره .. نزلت منها تحت .. شافت رسايل وراء بعض
من أحلاهم ..! كأن أحد صفقها .. مع أنها تدري ضاري راعي بنات .. ويكلم بس حست بالغيره حست أن ضاري وحنانه
وعطفه وحبه ملكها ماتبي أحد يشاركها أو يجربه غيرها ..
فتحتهم شافت الكلام ماتدري وش تعبر .. أسف وأعتذار وضحك ..؟! وش الموضوع ..؟! وش دخل خوات ضاري بالسالفه ..؟!
طرت على بالها تروح للمرسله قبل يجي ضـاري لانه قربت جيته ..
فتحت المرسله لقت كل الرسايل لـ ( احلاهم ) .. فتحت أول وحده وهي تبكي ودموعها تصب أكثر من قبل ..
شافت :
(( (( سلام ..خلاص ولايهمك الحر عند وعده بس اتعشى واجيك ان شاء الله )) ))
كانت أخر رساله ضاري أرسلها لـ ( أحلاهم ) .. ضاري كان يبي يرسلها لأشواق بس الحب وداها لبيان بدون مايحس ..!
ناظرت بالرقم بكت نزلت دموعها .. تخيلت ضاري الرجال ..! ناظرت حولها .. مين أحلاهم ..؟!!!
أسلوب الرسايل في الوارد أسلوب بنت ..؟! خير أجييييييييييك ..!
شلون ..؟!! راحت علطول لوقت أرسال الرسـاله ..! كانت ( 11 ونص ) وناظرت الساعه اللحين كانت 12 ونص ..
يعني قبل ساعه بالضبــط ..!
يعني يكذب ماكان نايـم ..؟! يعني هو مواعد وحده ..؟! يعني هو يكلم ..؟
أو يعني هو بيروح لما يطلع منها لأنثى ..!!!
فكرت بلعت دمعتها .. ساعه وحده ماأمداه يروح ..! معناته يكذب علي مافي دكتور بس يبي يروح علشانها .. وأنا بنت عمه
لحمه ودمه صرت مجرد عشـاء يتخلص منه ويمشي ويروح ..!
يعني الى هالدرجه يلعب علي ويستخف فيني .. بلعت أشياء كثيره وهي تغص بالآلم ..!
ضــاري هو كل شيء في حياتها .. وهي عند ضـاري ماهي شيء بحيـاته .. سمعت صوت الباب نزلت الجوال بسرعه
على الطاوله وأنسدحـت وهي تبكي ..
ودخــل ( ........... ) !!
Finished part
.
.
05-07-2009, 12:36 PM
رد: ( مافيه داعي يلمـح الجـرح .. حسّـاد ) [ رَوايــِــّــَهَ سُعّـوُدَيـَه ] ..!
! 
والحمد لله على سلامة الوالد طهور ان شاء الله 
العرض العادي
