السلام عليكم ..#
يالله حيهم واحد .. واحد .. يالله حي كل واحدن بإسمه وخشته !
كلكم عارفين إن البرد جاء .. وبالتحديد ( برد الريآآآآض )
ويقولون إن البرد السنه هذي أقوى من البرد السنه اللي راحت .. يعني برد برد .. مافيه كلام بزارين .. يعني لو تلبس ثوب برد وتلبس فوقه جكت وتلبس فوقه فروه وتلبس فوقه تسع بطانينات ما راح ينفع .. بالمختصر المفيد ( الله يعيييييييييييينك )
وترا البرد أحسن من الحر قسم بالله فالبرد نجتمع وسوالف وشبة نار وسهر و وناسه .. أما فالحر كل واحدن منبطح قدام مكيف وأخلاقه زقت .. الحين تلقى محل الدفايات مليان بالأوادم كل واحدن محمل 9 دفايات وتلقاه بعد اسبوعين من البرد يشتري خمس دفايات ثانيه .. أنا مدري الدفايات وين تروووح ؟! .. وبعدين الجمر وش سالفته .. أشتري كيس جمر وبعد اسبوع اشتري 3 أكياس جمر وبعد اسبوعين أطق 7 اكياس جمر .. وش هالبرد اللي ماوده يخلص
.. خساير ماديه وخساير جسديه لكن ( أحتسبوا الأجر
) وأشين شيء فالبرد هو قومة فالمدرسه .. كأنك شايلن على ظهرك كيسين أسمنت .. تقوم الصبح ونفسك في خشمك وبرد .. وتتوضأ للصلاة والبرد مقطعن عظامك .. وتقحف من الحليب الحار لكن ماينفع برد برد .. وتروح للمدرسه والبرد واصلن لأخر عظم في جسمك .. وتمارين رياضيه .. ( قصة مأساويه )
..
مرة من المرارير في الشتاء .. خلصت من صلاة الفجر .. ورحت لسيارتي العزيزه ويوم شغلت السياره وأشوف 90 بس طالعين من تحت السياره وكل واحدن فراشه معه .. الظاهر إنهم نايمين
.. المهم مالكم بالطويله وانا أدعس رايحن لفوال الطايف لعل وعسى ما ألقى زحمه وأخلص بدري .. ويوم جيت للفوال لين أمة محمد متحاشرين على الباب أزروا يدخلون من قوة الزحمه .. قلت في نفسي : هذولي ماعندهم أهل يسوون لهم فطور .. ( كلم نفسك
)
حطيت على R ودعست على البيت .. ويوم دخلت لينهم رقووود
.. قلت ما فيه حل إلا إني أدخل المطبخ وأقوم أطبخ .. سلمت أمري لله ودخلت
.. وأنا البس المريول هذا حق الطباخين
وألبس الطربوش وألبس القفازات البيض ( يعنني طباخ
) وأنا أولع النار وأحط القدر على الفرن وأقعد أطبخ .. وأسوي خبز على الصاج وحليب زنجبيل وأقعد أضرب فيه لين أنتفخ بطني .. و أروح أخمد لين دقت الساعه 12,00 ظهراً .. رحت صليت ورجعت لقيت الأهل جالسين كل واحد ماسكن له جوال ويطقطق فيه وأنا جالسن ماسك جريده .. وكل ما مر بزر ولا ورع قال لي : ياقدددمك !
.. وش أسوي جوالي يشحن وما لي غير الجريده .. وأخبارهم تجيب حومتن في التسبد .. إنقلاب شاحنه .. موت ورع .. ميزانية دولة .. ومليار رايح .. ومليار جاي .. وبعدها طاح الغداء وضربنا فيه لين قلنا خلاص ورحت أطقطق فالجوال لين أذن العصر .. وبعدها لعب كوره .. وأخيس شيء لا جاء واحد وكسرك فالبرد ذيك الساعه نقول لك : الله يرحمك .. بعدها أذن المغرب .. وبعد الصلاة جلسنا على القهوه والشاهي وحليب زنجبيل وسوالف وسعة صدر .. وخبر جاي .. وخبر راح .. وبعد صلاة العشاء .. جلسنا نبحلق عيوننا بالتلفزيون يقولون فيه مباراتن للهلال جلسنا نشوف المباراه .. وقلت لهم قبل المباراه : إن فاز الهلال عشاكم علي .. المهم فاز الهلال وتورطت
ورحت جبت عشا ودفعت و أنا ما أشوف الجاده
.. تعشينا ورحت سويت شاهي يقند الرآآآآس .. وسوالف وخرابيط وصواريخ ههههههههههههههههههههههههههه
.. لين دقت الساعه 2,30 الفجر .. بعدها كل واحد تناول مخدته وفراشه وكبسها نومه للظهر .. !
صفحتي في تويتر#
https://twitter.com/fahd_aloteby
