ماهو بكفو الوقت حبك يمحيه، ياللي تخاف صروف الايام تمحاه
إرتاح مادام المواصل يقويه، انت انت وانا انا وقلبي هو اياه
حتى ولو بتغيب ذكراك تكفيه، ياواحدٍ تكفي عن الناس ذكراه
حبك على رمله خفوقي مواطيه، ورياح عذلي عنك ما تمسح خطاه
واللي يعذل القلب عن درب غاليه، الله بما يبلا المواليف يبلاه
اخفيه يابالفيت والحال يبديه، ادناة واحد ينظر الحال يقراه
اخفيه فيه ومعتني ٍ به وحاميه، من كل عين ٍ ودها تنزل حماه
قلب ٍ يحبك والهوى الذرب ماليه، كانك مكذبني بعينك تحلاه
شرط ٍ تشوفك فيه منت بحواليه، ويمكن تشوف ديار واماكن ارعاه
وبتشوف به تمثال والوقت هاريه، وبتشوف زرع ٍ ميت وواقفٍ ماه
وبتشوف جرح ٍ فيه سكين راعيه، راح ونسى السكين والجرح ينخاه
وبتشوف حصن ٍ عج الاقدار سافيه، وبتشوف باقي بيت راعيه خلاه

لا تنزعج هذا خفوقي وباقيه، ولا تضايق من تصدع زواياه
قد زلزله فرقا وهزت عراويه، والله ستر والحظ عانه وعافاه
و كانه صلح لك وأعجبك زيد تبنيه، ابنه وجهّز للمقابيل مبناه
ابغيك بس من المفارق تداريه، وازهل من يداري شعورك ويدراه
وحلل وحرم فيه يابرك بلاويه، وحله وراع رضاي ورضاك ورضاه
جعلك بعد بعض الوجيهه امحق وجيه، ناس ٍ مراتعها الرفيق بتقفاه
انواع واخطر نوع ماني بناسيه، نوع ٍ على تفريق الاثنين مسعاه
تلقاه دوم وكل يوم ٍ تلاقيه، والى بغيته صدق ما عاد تلقاه
والا انت ردك كل ما ادعيك.. لبيه، انشهد ان منتوا بفيعيني اشباه
منت بمع العالم ولا تقول لي ليه، انت ادرى مني وش جوابي وفحواه
كذيه ومن الله يازين وإليه، واغلا طروش القلب ودواه من داه
الحلم ياتيني بزولك واراعيه، وفي كل حلم اقوم قبل اتحفاه
اعشق سميك في البزارين وادعيه، واقبل خطاه الى اخطا واتلقاه
واسمك يروعني الى مر طاريه، واحب ملقوف ٍ يسولف وطراه
وامر بيتك من بعيد ٍ ولا اجيه، وانا لونه في يدي ما اتعداه
حتى تواير موتري تلتفت فيه، تبغي تلف ويستحي العقل والجاه
وصلك يخيط الصدر والبعد يفريه، ويابري حالي كان صديت برياه
ويلي على ادري حبنا ويش تاليه، وويلي على ادري وش ورى الغيب ويلاه
عشان اشوف اذا محبتك ترفيه، والله لا اقفي عنك.. استغفر الله