اللي ما تابع معنا الجزء الرابع
هذي وصله سريييعة
اضغط هنا
---------------------------------------------------------
السلام عليكم
كيف الحال ,والعيال ,وأم والعيال ,وأخت أم العيال
انشاء الله بخير
هع هع
على العموم
قربنا لنهاية الرواية <<افرحوا بفككم من روايتي البايخة
هع هع
أنا عارف إني طولت عليكم بهالفصل
بس سامحوني كانت عندي ظروفي الخاصة
المهم بهالفصل بحاول أبين لكم كيف كانت معاناتي قبل ما رحت أمريكا
الصراحة كانت خوش معناة
على العموم
أهدتني هالمرة العضوه (الزعيمااات من منتدى القناص) عصير الربيع برتقال وقالت
زعيمات: هذا أحسن من البايسون والريد بول ... مفيد مررة ويقولون (الربيع يعطيك الحيوية أكثر).
ياحليلك يا الزعيمااااات
ومشكوره على الهدية بس طعمه قلق يجيب لي - وانتوا بكرامه - (بــلــغــم) << أنواع القرف << هع هع
وولا يهمك هذاني حاط اللاب توب ومولع أغنية لفرقة (Blue) اسمها (All Rise) عشان أسترجع ذكريات التحلية وقعدت أكمل باقي الرواية
هع هع
استعدوا للمغامرة <<< مصدق نفسه في دعاية (صافيو) << بزر هع هع
ثلاثة
اثنين
واحد
يلا شباب<< لا تحسبوه البرنامج اللي كان يجي بالام بي سي
هع هع
=========================
عنوان الفصل
>> منى بكون حبيبك للأبد <<
حبيبنا الزعيم رجع لبيتهم من بعد ماطلع من عندي وحبس نفسه بغرفته وكان صوت السي دي اللي أخذه من عندي عالي
و24 ساعة هو بالغرفة وإذا حان وقت الغداء أو العشاء
تجي الشغالة تحطه جنب الباب وتروح وهو يفتح الباب ويأخذه
المهم نرجع لسالفتي ويا أمي حبيبتي بخصوص الزواج
<< نسترجع الأحداث >>
رهيف: طيب ومين ناوين تزوجوني؟؟
الوالدة: اللي تبي بس انت أشر وأنا انشاء الله اروح أخطبها لك وش رايك؟؟
رهيف: طيب أنا عندي وحدة دين وأخلاق وجمال وو....إلخ إلخ
الوالدة: قصدك (منى)؟؟؟
رهيف: منى!!! ومين منى؟؟ << مسوي ما أعرفها
الوالدة: علينا الكلام هذا؟؟ أنا أمك وعارفتك زين ومستحيل يخفى علي شي... يلا أعترف
رهيف: وكيف عرفتي؟؟؟
الوالدة: أول شي حبيت أقولك اني عارفه كل شي عن الحركات هذي ... ضحكك بالليل وكلامك وهالشغلات معقوله بتكون تكلم خويك؟؟
رهيف: طيب طيب.. الوالد درى؟؟
الوالدة: أفا عليك يا رهيف!! تشك بأمك ؟؟ سرك في بير يا حبيبي
على العموم
ما انصحك بهالبنت تلاقيها مكلمه 20 ألف واحد قبلك ومسويه فيهم نفس الحركة
رهيف: لا يمه هذي منى أعرفها وحدة حبوبه وعلى نياتها والله
الوالدة: يمكن والله ليش لأ ,بس أنا ما ارتحت لها مدري ليه
<< مثل ما قالت العضوه (سكره مالحة من منتدى القناص) >>
رهيف: بكيفك ... على العموم مين كنت حاطه ببالك؟؟
الوالدة: الصراحة اذا تبي شوري مالك إلا بنت خالتك (الجوهرة) , دين وأخلاق ووو... إلخ إلخ
رهيف: يووووه يمه ماقلنا مانبي أقارب؟؟
الوالدة: طيب طيب ولا يهمك خلاص بشوف لك وحدة المهم انت موافق على الزواج
رهيف: ومين قال؟؟ أنا قلت بفكر
الوالدة: خذ راحتك... وإذا قررت خبرني
رهيف: ولا يهمك خلاص يصير خير.
وماصدقت تطلع من الغرفة إلا ومسكت التليفون وكلمت منى على طوووول
رهيف: سلاااامو منى << خربت والله
منى: هلا يا قلبو كيفك؟؟
رهيف: شايفك فاضية وإلا؟؟ على العموم أبيكي بسالفة ضروري أوكي
منى: طيب طيب شوي شوي علي ,خلاص تعال الحين أنا انتظرك
رهيف: اوكي مسافة الطريق سلاااام
منى:سلاااام.
وأنا قاعد أشخص دخل علي الوالد وقال
الوالد: رهيف هذي هدية صغيرة بمناسبة نجاحك ,تعرف أنا ما أعطيتك شي يوم نجاحك ,على العموم خذ هذي البطاقة
رهيف: أفا عليك ,انت الخير والبركة ,ووشو هالبطاقة؟؟
الوالد: هذي ماستر كارد
رهيف: ماستر كارد؟!؟!؟
الوالد: ايوا ماستر كارد ,أبيك بهالأسبوعين تسوي اللي تبيه رح للمول واشتر اللي تبي ملابس أي شي ,اطلع انت وخوياك لأي محل ,عشهم على حسابك سو اللي تبيه
رهيف: الله يجزاك خير , بس كم فيها؟؟
الوالد: فيها 20 ألف ريال
رهيف: وشو 20 ألف!!!! أكييد تنكت .....20 ألف غالية والله
الوالد: بس مو أغلى منك حبيبي ههههه تستاهل والله يلا أنا وراي كم شغله بخلصهم اليوم وأبي أخذ (الاند كروزر) وبخليلك (البي ام) شخّص فيها على عيال الرياض وبرجع وأبي أشوفك في البيت الـساعة 10 أبيك بسالفة
رهيف: من عيوني الساعة 10 الساعة 10 وش ورانا ... بس بغيت أسألك سؤال صغير ممكن
الوالد: آمر تفضل..
رهيف: فيه بطاقة لونها أبيض تشبه بطاقة الأحوال كل ما شافها واحد انقلب 180 درجة بالتعامل مع راعي البطاقة تعرف وشي؟؟
الوالد: والله ما أدري بس على ما أعتقد هي بطاقة (عدم تعرض)
رهيف(بتعجب): عدم تعرض!!!
الوالد: ايوا عدم تعرض .. هذي بطاقة ما تكون إلا مع الأمراء واللي تحتهم ليه؟؟
رهيف: لالا ولا شي بس حبيت أستفيد...يعطيك العافية.
خلصت كلامي مع الوالد ورحت مباشرة للكراج وفتحت البوابة وطلعت حبيبتي الـ(BMW) وحطيت رجلي لبيت (منى) ,وأنا في الطريق كلمت الـ(زعيم) ورد علي
الزعيم: هلا (رهوف) أخبارك؟؟
رهيف: أشوف تغيرت الأحوال ههههه وش فيك اليوم مبسوط
الزعيم: أي مبسوط إلا تقدر تقول بطير من الفرحة
رهيف: ليه؟؟
الزعيم: أنا التزمت....
رهيف: وشو ؟؟؟؟ التزمت؟؟؟ كيف؟؟؟ ومتى؟؟؟
الزعيم: ايوا التزمت وش فيها؟؟؟ ربك هداني
رهيف: الله يثبتك بس على العموم وش صار على شغلتك
الزعيم: يعني لازم تذكرني فيها... أنا ماصدقت أنساها
رهيف: آسف ازعجتك على العموم حبيت أتطمن عليك يلا توصي شي؟؟؟
الزعيم: لا سلامتك بس خلينا نشوفك
رهيف: يصير خير يلا سلاام
الزعيم: سلااام.
<<سبحان الله مغير الأحوال ,ما نقول إلا الله يثبته>>
نرجع لقصتنا
المهم كملت طريقي ووصلت لبيت (منى) وأرسلت لها مسج وقلت لها > يلا انزلي مافي أحد بالشارع تطمني <
قرت الرسالة وشكلها ما صدقت ,نزلت وركبت للسيارة
منى: السلام عليكم
رهيف: وعليكم السلام ,وش عند الأدب اليوم مقطع بعضه عندك
منى: أقول رهيفوه وش بلاك اليوم علي؟؟؟ ميب عادتك
رهيف: لالا ولاشي سلامتك بس ماشبعت نوم وأخلاقي زفت سوري
منى: لا عادي أنا بخلي اخلاقك تمام بنص ساعة بس
رهيف نص ساعة!!! كيف؟؟
منى: ماعليك أنا قلت نص يعني نص ووش كنت تبي فيني؟؟
رهيف: سلامتك ما كنت أبي شي بس ولهت عليكي وحبيت أشوفك حرام؟؟
منى: الله يقطع شيطانك رهوف ,خوفتني ههههه ,طيب انت وش تبي فيني الحين؟؟ شوفتني خلاص وش تبي بعد؟؟
رهيف: أبي أشبع من شوفتك ,خبرك وراي بعثة لأمريكا وياخوفي أمووت هناك ولا أشوفك
منى: الله لا يكتبه بس ,تعوذ من الشيطان ,انت أكيد فيك شي؟؟
رهيف(بطرف عين): معذور والله ,أحد يشوف قمر ولا ينهبل
منى(باستحياء): أحرجتني والله ههههههههه يسلمو
رهيف: الله يسلمك ,طيب وين ناوية تروحي الحين؟؟
منى: ياولد يعني بنطلع ,أنا طفشانه لحالي بالبيت لا طلعة ولادخله ,أممممممممم ابي أرووووح....
رهيف: من كبر الرياض؟؟ وين تبي تروحي إخلصي
منى: هههههههههه والله انك صادق ,أنا ابي أروح السوق ممكن؟؟
رهيف: ممكن ليش لأ... يلا جاهزة؟؟
منى: بطلع أجيب شنطتي من فوق وأنزل لك .. ثواني
رهيف: تيت .<< وتعني/ تيك يور تايم وبالعربي/ خذ وقتك >>
طلعت منى ونزلت وركبت وقالت
منى: ايوا كلش جاهز يلا ننطلق
رهيف: طيب طيب شكلك شايفة فلم كرتون قبل شوي وإلا
منى: توه مخلص أبطال الديجتل هههههههههههه ,من الطفش قاعده أتابعه
وحنا بالطريق صار بيننا المحادثة التالية
رهيف: اقول منى وش تبي من السوق؟؟
منى: سلامتك حبيبي ما بي شي بس أتمشى
رهيف: نعم؟؟؟ تتمشي؟؟؟ صدق انك فاضية
منى: أمزح معك يا قلبوو صدقت؟؟ والله أنا بدور بالسوق وبدور لي كم تنورة على كم تي شيرت وهالشغلات ,وأفكر نمر على المحلات الرجالية نشتريلك كم شي أحسن من هالثوب اللي هريته من كثر اللبس
رهيف: بس عاجبني الثوب ههههه أوكي تحت أمرك.
رحنا لمول من هالمولات ودخلنا كم محل < طبعاً الست (منى) زي باقي الحريم تدخل محلين ثلاثة وبعد كذا ترجع للمحل الأول > وحنا بمحل من هالمحلات
منى: يااااااااالله محلاها هالتنورة الورديه تجننن وربي وإلا وش رايك رهيف؟؟
رهيف(يصرف): لا لا حلوة حلوة تبيها خذيها وفكينا
منى: طيب طيب ... يا معلم كم هالتنورة؟؟
<< طبعاً (منى) تستهبل راعي المحل كان لبناني >>
اللبناني: خيتو هادي بـ 220 ريال وبعد الخصم بـ219 ريال شايفه يا بلاش كل شي عندنا مخفض
منى: أمحق من تخفيض بس ريال؟؟
اللبناني: أيوا ريال نعمة ... بتجيبلك واحد بيبسي ... شو مو عاجبك؟؟ هادي نكست خيتو يعني ماركه مو أي كلام...
<<الصراحة بهاللحظه كان ودي أصك اللبناني كف أنسيه عمره ,مسوي دمه خفيف>>
منى: إلا إلا عاجبني ليه لأ
رهيف: وش اللي عاجبك؟؟ ووش فرقها عن باقي التنانير؟؟
منى: هذي ماركة يا بابا ماركة مو أي كلام على قولت اللبناني
رهيف: طيب طيب اخلصي
جينا للحساب طلع عليها كل شي بـ 1200 ريال طلعت منى محفظتها فوقفتها وقلت لها
رهيف: بوريكي حركة جديدة ممكن
منى: تفضل مسيو...
وطلع بطاقة الماستر كارد واعطيها للمحاسب وأقول
رهيف(بغمزه): وش رايك فيني ؟؟ حركات صح؟؟
منى: ليه كذا؟؟ أنا اللي شريت يعني أنا اللي أدفع
رهيف: ياخيتي انتي بمحل على ما تقولي ماركة يعني شغلة الكاش صارت زمان جا دور الماستر
<< أنا مسوي فاهم >>
منى: اها اجل كذا..أوكي بس هالمرة
واحنا ماشين بالمول شوفنا مصرية تركت ولدها بعربيته عند باب المحل ودخلت
ناظرت (منى) فيني وقالت
منى: رهيفوه... تفكر باللي أفكر فيه
رهيف: للأسف لأ << لقطي وجهك يا (منى) هع هع >>
منى: يوووووووه.
وطلعت من شنطتها قلم (فولماستر) ورسمت على وجه البزر المصري شنبات وحركات ودخلت المحل< مسويه انها ما سوت شي > بس مين اكلها ؟؟؟ مافي غيري
طلعت الأم المسكينه من المحل وشافت ولدها انلعب بوجهه وما تركت احد حولها إلا وسمع صوتها<< عاد مصريه واسمعوا الصوت >> وكان في واحد ملقوف أشر علي وقال< هذا هو اللي سواها > ما صدقوا الحرس سمعوا الكلام ومسكوني ورموني برى المووول زي-وانتوا بكرامه- (ال***) ,كلمتني بعدها (منى)
منى: هههههههههههههههههههههههههههههه الصراحة وشكلك وانت تنشات برى رووووعة المفروض أصوره وأعرضه بالتلفزيون بمشهد فكاهي وأنا متأكدة انو بياخذ الأول
رهيف: باااااااااايخه بااااااايخه.. اخلصي تعالي دخليني...الحرس مانعني من الدخول اطلعي من البوابه الثانية اوكي
منى: طيب طيب
المهم طلعت ودخلتني قعدنا ندور بالمول وأي شي تختاره اشتريه لها على طووول << معاي ماستر كارد مين قدي >> ,وحنا بالطريق شوفنا كمان بزر يمكن عمره حول الـ4 سنوات, ناظرنا ببعض أنا و(منى) وابتسمنا ابتسامة (خبث) وقالت (منى)
منى: هاه الحين الظاهر انك تفكر باللي أفكر فيه
رهيف: وش رايك؟؟ طيب معاكي قلم ثاني؟؟
منى: تامر أمر تفضل...
طبعاً ما قصرنا نادينا البزر وقلناله بنعطيك حلاوه , البزر صدق وجا , وأنا و(منى) قمنا بالواجب معاه ,وحطينا رجلنا بعدها واحنا نضحك ,(منى) استلمت العيون والجبهه <<مسويه (ميك أب)>> وأنا استلمت الجزء اللي تحت ما قصرت معاه سكسكتله سكسوكه ولا الحلاق التركي أحلا من سكسوكتي بألف مره.
وصلنا للمحلات الرجالية ,نقيت لي كم جينز << أموت في الجينز الصراحة >> وطبعاً (منى) ما قصرت معي نقت لي كم تي شيرت يجننوا وقالت (هذي لأمريكا)
وخلصنا من المول والحمار (رهيف) < اللي هو أنا وانتوا بكرامه > شايل كل هالعفش بيده ,وصلنا السيارة وحطيت الأغراض بالشنطة , مشينا عشان أرجعها بيتها.
وحنا بالطريق ,اشتهت (منى) كوفي , فوقفنا عند (د.كيف) وطلبت على ما أذكر < 1 كابتشينو و1 وموكا بااارد > الكبتشينو لـ(منى) والموكا لي أنا.
ويوم قربنا لبيت (منى)سألتني سؤال غريب شوي قالت
منى: رهيف...
رهيف: عيون رهيف آمري
منى: مايامر عليك عدو بس حبيت اسالك سؤال بسييط ممكن؟؟
رهيف: تفضلي آمري تدللي
منى:رهيف انت تحبني؟؟؟
( سنعود بعد الفاصل......)
:::::::::::::::::::::::::::::::::::::::::::::::
الإعلانات التجارية
تن تن تن<< أبوك يالموسيقى
::::::::::::::::::::::::::::::::::::::::::::
هذه الرواية برعاية
بيبسي ... خلك قدها
توكس ... لواحد مش لتنين
ريد بوول ... بيعطيك جناوح << على قولت ولد خالتي << هع هع
::::::::::::::::::::::::::::::::::::::::::::
عدنا.........<< متأثر بسبيس توون << هع هع
نرجع لروايتنا
رهيف: تفضلي آمري تدللي
منى:رهيف انت تحبني؟؟؟
رهيف: وش رايك ؟؟؟
منى: لا والله من جد تحبني؟؟
رهيف: أصلاً ما يبيلها كلام
منى: طمنتني <<< مسكينه على نياتها
من جد مسكينه ,خوفت أقولها بخبر خطبتي بس شوفت الوقت ما يسمح قأجلتها لوقت ثاني
رجعتها بيتها وقالت لي:
منى: رهوف ممكن اسمع صوتك الليلة
رهيف: كم تدفعي
منى: باااايخة << طيحت وجهي والله << هع هع
رهيف: طيب ولا يهمك الوالد يبيني الساعة 10 ضروري وبكلمك بعد ما اخلص
منى: الساعة 10!!!! الصبح قصدك؟؟الحين الساعة 12 ونص
رهيف(منفجع): 12ونص؟؟؟ طيب طيب يصير خير تأخرت على أبوي يلا سلااام أكلمك وقت ما أفضى
منى: ههههههههههههههههههههههههههههههههههههه
رحت على طول على البيت ولقيت الوالد مستنيني على باب البيت
الوالد: بدري...تو الناس..
رهيف: لا والله تعرف الزحمة هاليومين بالرياض وكذا..<< كذبه بيضاء<<هع هع
الوالد: ايوا أجل تقولي زحمة << شكله مو مصدقني >> طيب أبيك بغرفتي ضروري
رهيف: اتشاء الله تحت أمرك بس أغير وأجيلك
طبعاً سمعت كلام الوالد ورحت لغرفته ولقيته هو الوالدة (وزيرة الداخلية لببيتنا) ودار بيننا الحوار التالي:
الوالد: هلا رهيف حياك تفضل.
دخلت وقعدت على الكرسي وقلت
رهيف: سم يبه أوامرك
الوالد: ما يامر عليك عدو بس حبيت أعرف وش قررت بموضوع الزواج
رهيف: يوووووووووووووووووووووه لازم موضوع الغثى هذا؟؟
الوالدة: أي غثى يا ولدي؟؟ احنا نبي مصلحتك والله
رهيف: عارف يمه بس موضوع الزواج ياليت تشيلوه من دماغكم هالفترة بس إلين أفكر وأركز وش بسوي بحياتي ,لسه باقي لي أروح أمريكا شهرين قبل الدراسة عشان انظم شغلي هناك ,وبعدها افكر بالزواج
الوالد: طيب طيب وعلى السكن..
رهيف: وش دعوى نسيت سكن الجامعة وإلا؟
الوالد: لاما نسيته بس قلت يمكن تروح تسكن عند عمك أحسن وش رايك؟؟
رهيف: No Way مابي أكون ضيف ثقيل على عمي وكمان أنا ما شوفته بحياتي ,يعني ما أمون عليه لذي الدرجة
الوالد: على العموم لما توصل هناك أبيك تزور عمك ,على الأقل صلة رحم
رهيف: من عيوني بس وش دراني بعنوانه؟؟
الوالد: وش فيك رهيف؟؟ نسيت اني كنت ساكن عنده 4 سنوات؟؟
< الوالد معاه حق كان بأمريكا 4 سنوات دراسة >
رهيف: طيب طيب يصير خير
الوالدة: لا تنسى تسلملي على (سندي) وقولها اشتقتلها مووووت
رهيف: (سندي)؟؟؟ مين (سندي)؟؟
الوالد: هذي زوجت عمك الأمريكية ,وانت داخل لها ياليت تاخذ لك علبة ببسي هدية ,عشان هي تمووت بالببسي موووت ههههههههههههههه
رهيف: يوصل انشاء الله بس كيف بفهمها كلمت (اشتقتيلها موووووت) بالإنكليزي؟؟
ضحكوا امي وأبوي وانا قعدت أناظر فيهم واقول في نفسي
<< يجعلني ما عدمها هالضحكة ,ياليت أشوفها دايم على وجيهم >>
طبعاً نسيت ما كلمت (منى) ذيك الليلة وسحبت عليها.
بعدها كلموني الشباب وقالوا انو عندهم طلعه هجوله بالرياض ,لفتين وراجعين ,طلعت معاهم ,بس للأسف ما كنت أحس بذاك الشعور اللي جاني بعد أول مرة ,الظاهر اني تعودت على الموضوع .
رحنا لحي الصحافة جبنا لنا صديق قدييم من هناك وبعدها لسويدي جبنا من هناك كمان واحد << شوفوا المشاوير >> والله الحمد لله تمت الطلعة على خير وبدون بنات ولا شي << مأدبين هالمرة >>.
ملخص اللي صار في الطلعة /
1/تم بحمد الله تفريغ بكيت < دويفدوف أبيض > كاامل بخمس ساعات تقريباً << بايعها >>. بسبب الأخت (منى) هي سبب ادماني ,الله يسامحها بس.
2/ تعرفنا على ناس من الكويت لقيناهم بطريق العليا العام عند الإشاره < هم (باك أب) واحنا (جيب هوندا) مين قدنا >.
3/ ساعدنا بانقاذ أنفسنا نحن من حريق شب ببيت أحد المواطنين << القصة وما فيها شوفنا سيارة دفاع مدني ماشية بطريق العليا ,وكالعادة اللي فينا يالسعوديين لازم التجمهر ,فظلينا وراهم حتى عرفنا وين تم الحريق ,فدخلنا يقالنا نبي نساعد ,بس للأسف أنا من عند الباب جاتني دوخه من الدخان ,أمحق منقذ هع هع >>.
4/ اشترينا شاورما لولد عم حبيبنا(ليل جي) اللي أزعجنا من يوم أخذناه من بيتهم وهو يبي شاورما
فقلناله ما في إلا مطعم (ماما ساره).
5/ غازلنا ما يقارب (شغالتين أو 3 ما أذكر بالضبط) كانوا مع سواق بطريق التخصصي< بستثنائي أنا مؤدب >.
6/ ما قصروا الشباب بالرقص على أغاني الطقاقة الشهيرة (موضي) الصراحة ياهو رقص ,حركات والله.
7/ قسيمة عدم حمل رخصه لـ(عليان) هدية مقدمة من الدوريات بمناسبة نسيانه لرخصته. << هع هع >>
8/ تعشينا ورجعنا بيوتنا.
حا اليوم اللي بسافر فيه ( بنسلفانيا< ولاية بامريكا) قمنا الصبح على رنة جوالي وكالمعتاد كانت (منى) هي المتصلة
رديت عليها وأنا مالي خلق وأقول يالله صباح خير
منى: Hi Rhiyfooh (هاااي رهيفوه)<< مسويه انكليزي
رهيف: hi Mona, good morning (هاااي منى, صباح الخير)
منى: I'm miss you so much Baby (انا اشتقتلك عزيزي كثيييراً)
رهيف: أقول (منى) .. وش جاكي على الإنكليزي على الصبح
منى: هههههههههه ... لا بسس حبيت أختبر نفسي باللغة ,تعرف دروس النت صعبة ,ويقولون لازم ممارسة اللغة عشان تتعلمها ,فقلت مدامك تعرف تتكلم انكليزي أتكلم معك...
رهيف: الله يقطع بليسك مع هالصبحية ,ضحكتيني وأنا ما ودي أضحك
منى: رهيف ممكن أطلب منك طلب؟؟
رهيف: أمري تفضلي , بس ياليت تختصري لايجي أبوي وشوفني اتكلم معك
منى: طيب لا تعصب ,أبي أروح معك للمطار ممكن؟؟
رهيف: انت انهبلتي وإلا وش صار فيكي؟؟ كيف تروحي معاي؟؟
منى: يوووووه طيب ماراح اشوفك 3 شهور ياظالم وماتبيني اشتاقلك ,بليييز وافق عشاني
رهيف: يووووه طيب طيب خلاص ولا يهمك , أنا الساعة 5 العصر بحرك من البيت وبمرك ,بس مين بيرجعكي؟؟
منى: لا تشيل هم أنا أدبر نفسي ,حتى لو أرجع لبيتي رجليه بس المهم أودعك
رهيف: Ok See Ya…
منى: نعم؟؟؟ ما فهمت؟؟؟ وش تقول؟؟
رهيف: أمحق من تعليم ,أنا أقول لك أشوفك بعدين ,كذا كلمة إلى اللقاء بأمريكا فهمتي؟؟
منى: أيوا أيوا فهمت طيب وكلمة Bye Bye؟؟
رهيف: باي باي قديييمة الحين هذي مطورة واحسن هع هع
منى: طيب طيب See Ya
طبعاً الوالدة ما قصرت معاي ,جهزت لي كل شي من شنط وكوي لثوبي وشماغي ووو..إلخ إلخ < الله يحفظها >
وأنا طالع قالتلي الوالدة
الوالده: رهيف خلي بالك على نفسك ولا تنسى تكلمني كل شوي ... وإلا أقول لك أنا اللي بكلمك .... ولا تنسى تصلي وتنام بدري وتروح للجامعة بدري وتفرشي أسنانك قبل النوم .....<<ياحليلها>>
رهيف: من عيوني يمه أنا حاضر
الوالد: هذي كروت صعود الطائرة يا رهيف سويتها لك اليوم من واحد صديقي ,انت ما عليك إلا انت تشحن الشنط وتروح على طول على البوابة ,ولا أوصيك يا ولدي خلي بالك من نفسك
<< معلومة صغيرة نسيت أقول لكم اياها / الوالد يداوم بمطار الملك خالد بالرياض <واسطه قوووية >>
رهيف: الله يجزاك خير ما قصرت والله ,يلا أشوفكم على خير
الوالد & الوالدة: الله معك.
طلعت من البيت وأنا أبكي على فراق والديني < غصبن عني > وركبت سيارتي وحركت على بيت الحبيبه (منى)
هالمرة كانت مستنيتني عند الباب ولابسه عبايتها ,المهم ركبت معاي وتحركنا وحنا في طريق المطار صار بيننا هالحوار البسيط
منى: أقول رهيف
رهيف: عيون رهيف هلا
منى: يوم تروح أمريكا... بتنساني؟؟
رهيف: أنساكي ؟؟ حرام عليكي أنا انسى عمري ولا أنساكي وش هالسؤال البايخ هذا
منى: يا حبي لك والله بس حبيت اتطمن انك بتكون لي بس مو لوحده غيري.
في هاللحظة تذكرت موضوع زواجي فقلت حرام اجرحها بهالخبر عشان كذا خليني ساكت
رهيف: من هالناحية تطمني.. أنا أصلاً ما بلاقي مثلك
منى(بحرج): أحرجتني رهوف ... على العموم طمنتني.
كانت (منى) طول الطريق تناظر فيني وأنا اسوق وتبكي مدري ليش ؟؟ هل هي تعلقت فيني لذي الدرجة وخلتني أسوى حياتها كلها وإلا وش السبب؟؟ أنا كل ما شوف عيونها الحلوة تدمع ,أحس قلبي من جوى يتقطع والله ,الصراحة شعور صعب ,وخاصةً موضوع خطبتي.
وصلنا للمطار وكلمت ليل جي بالجوال
رهيف: هلا لولو وينك؟؟
ليل جي: أنا توني داخل المطار قاعد أقطع كروت صعود الطائرة وانت؟؟
رهيف: أنا توني موقف سيارتي بالمواقف ونازل لك ,خلص وقابلني عند مكان انتظار الركاب اوكي
ليل جي: أوكي See Ya
قفلت الخط ودخلت السيارة بمواقف الموظفين<< بحكم أنو الوالد موظف هناك >> وقبل ما أنزل مسكتني (منى) وقالت
منى(وعيونها تدمع ومنزله راسها): رهيف .. توعدني انك تهتم بنفسك؟؟
قربت لها ومسكت دقنها من تحت ورفعت راسها وخليت وجهي مقابل وجهها مباشرة
<< وش تتوقعوا كنت بسوي؟؟ أبي رأيكم بصراحة >>
( سنعود بعد الفاصل......)
:::::::::::::::::::::::::::::::::::::::::::::::
الإعلانات التجارية
تن تن تن<< الموسيقى مرة ثانية << هع هع
::::::::::::::::::::::::::::::::::::::::::::
هذه الرواية برعاية
بيبسي ... خلك قدها
توكس ... لواحد مش لتنين
ريد بوول ... بيعطيك جناوح << على قولت ولد خالتي كمان << هع هع
::::::::::::::::::::::::::::::::::::::::::::
عدنا.........<< كالعادة سبيس توون << هع هع
نرجع لقصتنا
نسترجع الأحداث
منى(وعيونها تدمع ومنزله راسها): رهيف .. توعدني انك تهتم بنفسك؟؟
قربت لها ومسكت دقنها من تحت ورفعت راسها وخليت وجهي مقابل وجهها مباشرة
وقلت لها
رهيف(مسوي ثقل هو ووجهه): الله أعلم مين اللي لازم يوعد الثاني وإلا؟؟
منى:تصدق رهيفوه... تقوقت تقول شي رومنسي و تسوي حركة ... يعني من هالكلام
رهيف: يؤيؤيؤيؤيؤ لذي الدرجة تحبيني << مسوي غبي >>
منى: تستهبل انت؟؟ انا أموت فيك موب بس أحبك .. ولله وأعلم معزتك كم تسوى بقلبي... انت صرت لي أبوي وأخوي وكل شي
رهيف: يسلمو حبيبتي .. والصراحة أنا اكثر .. بس ما قدرت أقولك.. ويلا غيري هالوجه الحزين هذا ووريني ذيك الابتسامه الحلوووة أبي أسافر وأنا متطمن عليكي مو زعلانه
منى: طيب طيب ولا يهمك بس تكفى لا تنساني هناك... .. رهيف أنا مابي من الدنيا هذي كلها غيرك
رهيف: وأنا أقدر؟؟ أنا لو أنساكي انا أمووت .. مدري كيف بستحمل 3 شهور بدون ما أسمع صوتك
منى: في اختراع اسمه (ماسنجر) وإلا نسيت؟؟
رهيف: والله اللي يشوف هالوجه ينسى الماسنجر واللي جاب الماسنجر
منى: خلاص خلاص يلا قوم رح لطيارتك بعد شوي بتقلع لا تروح عليك
رهيف: من عيوني ,بس ما ودك تنزلي تودعيني وإلا لأ ؟؟
منى: الله يقطع سوالفك ... طيب طيب بنزل وأمري لله
نزلنا من السيارة وحمل الشناط < أصلاَ ما في إلا شنطه وحده ههه > وحنا بالدرج الكهربائي اللي بالمطار
منى: رهيف ما ودك أشيل عنك الشنطة؟؟
رهيف: منى !!! وش بلاكي اليوم مختبصة ؟؟ وش فيكي يختي أنا أقدر أشيل الشنطة لحالي
منى: طيب طيب خلاص فهمنا فهمنا
رهيف: طيب كيف بترجعي؟؟ أنا خايف عليكي ؟؟
منى(بغمزه): أخيراَ حسستني انك تحبني؟؟
رهيف: حسستك !؟!؟!؟!؟ وأنا من متى ما أحبك؟؟
منى: يسلمو على العموم أنا باخذ تكسي لبيتنا بس ياخي يبي 50 ريال حرام
رهيف: والله أعطيه مليون بس أضمن انه يوصلكي البيت بخير.
وكان بجيبي 100 ريال عطيتها اياها وقلت
رهيف: هاكي 100 ريال مو بس 50
منى: رهيف؟؟ وش أنا أطر عندك؟؟
رهيف: مو أنا أبوكي على قولتكي ولازم أصرف عليكي؟؟ المهم خذي وانتي ساكته
منى: جزاك الله خير .. والله أنا من غيرك مدري وش بيصير لي
رهيف: كل خير بس انتي الحين ارجعي لبيتك وحطي راسك ونامي وانشاء الله لما تقومي تلاقيني واصل وبكلمكي
منى(بحزن): انشاء الله .. يلا اشوفك على خير
رهيف: مع السلامه حياتي الله معك.
راحت (منى) للبوابه ووقفت تكسي وراحت لبيتها
المهم أنا لقيت (ليل جي) وسلمنا سلام (نقا << على قولته) ورحنا للطيارة وقعدنا بالدرجة الأولى << مين قدنا >> و(ليل جي) قاعد جنبي مبسوط
ليل جي: تصدق رهوف هذي أول مرة اللي اروح فيها بالطيارة درجه أولى؟؟
رهيف: يا مسكين أنا دايماً هههههه المهم أنا بنام والله نعسان طيب اذا صار أي شي قومني
ليل جي: طيب طيب بقولهم يحطون لي فيلم أكشن وحركات
رهيف: سو اللي تبي بس خليني أنام
أنا ما صدقت قلت للفليبينية (المضيفة) جيبي لي مخدة وحطيت راسي ونمت و(ليل جي) قاعد يلعب بألعاب الطيارة << من الفرحة مسكين هههه >> الرحلة تمت 15 ساعة تقريباً إلى ولاية (بنسلفانيا) المهم تمت الرحلة على خير ووصلنا بالسلامة
طلعنا من الطيارة وشوفت عالم ثاني هناك بأمريكا شي خياااالي الصراحة , أنا مو مصدق حالي بأمريكا
المهم رحنا وأخذت شنطتي من الشحن أنا و(ليل جي) وأنا طالع لقيت واحد أمريكي موقف في الإستقبال وشايل لوحة مكتوب عليها (k.s.a - Rhiyf - Rashed) يعني (السعودية - رهيف - راشد) أنا استرغبت منه قلت يمكن مرسلينه الجامعة لنا < مصدقين إنا مهمين هع هع > قلت لـ(ليل جي)
رهيف: لولو انت روح للسكن حق الجامعة و**ط كل شي هناك وأنا بجيك بعدين أوكي
ليل جي: وش اللي أروح لحالي وانت وش بتسوي؟؟
رهيف: عندي شغل الحين لازم أخلصه وباجيلك أوكي
ليل جي: طيب طيب أوكيشين بس كيف بقابلك؟؟
رهيف: بورح للجامعة وأقول لهم وين (ليل جي)
ليل جي: طيب طيب See Ya
رهيف: See Ya
نرجع لباقي أبطال القصة في فترة اللتي سبقت
(عليان) و(مهندوه) ما تركوا الطلعات اليومية للتحلية وباقي أنحاء الرياض.
(الزعيم) حفظ القرأن كامل << مشاء الله عليه >>وصار مدرس تحفيظ في مسجد حارتهم<<ادعوا له بالثبات>> لكن هل تظنون انه بيقعد على حالته إلين أرجع؟؟ الله أعلم
(مزنه) ما لها لا حس ولا خبر بعد اللي صار < عارفين وش صار ما يحتاج نعيد ونزيد >.
(الوالدة) راحت لعروس البحر الأحمر (جدة) للزيارة (جدتي) وناويه تقعد هناك فترة قعدتي بأمريكا كامله.
(الوالد) ودا (الوالدة) لـ(مكة) واعتمر هو و(الوالده) وبعدها حطها عند أمها (جدتي) بـ(جدة) ورجع للرياض لإكمال عمله.
(حمد) ما زال يلعب على خلق الله بصوته الحلوو ويسحب بطايق < مسبوقة الدفع (سوا) > وهو الآن بالصف الثالث ثانوي.
(منى) هذي سالفتها سالفة ,رجعت لبيتها وكلمها خالها اللي بـ(كويت) وراحت تغير جو هناك مع بنات خالتها الثلاث الحلووين.
(منصور) الله واعلم وش صار فيه بس بيصير له ظهور ثاني بأخر الرواية.
(خالة منى) ماتت < الله يرحمها > بالمستشفى ما تذكروا << هع هع >>.
مين تتوقعون اللي جاء يستقبلني عند المطار بـ(بنسلفانيا)؟؟؟
تتوقعون مندوب من الجامعة ؟؟؟ وإلا صديق قديم للوالد؟؟
وش تظنوا بيصير بيني وبين (منى) طول فترتي بأمريكا؟
هل بقطعها؟؟ وإلا بتقطعني؟؟
(منصور) ... هل بيظهر مرة ثانية ويدب الرعب في قلوب من حوله؟؟
وهل تتوقعون انو (ليل جي) بيكون شريكي بسكن الجامعة؟؟
أسئلة كثيرة منتظرة أجوبة...
وأجوبتها بالجزء اليديد اللي بعنوان
>> راشد ؟!؟! ياترى مين هو راشد؟؟؟ <<
=========================
هاه .. كيف الفصل معاكم؟؟
انشاء الله عجبكم
وانتظروني بالجزء السادس اللي بعدي يومين تقريباً
تقبلوا تحياتي مني أنا
>> رهيف الإحساس <<
ومن منتداي
>> شبكة موسيقى العرب <<
وعلامة الجودة المعروفه :
>>> تشاوتشاو <<<
11-09-2006, 05:47 PM
من أولى رواياتي - حــلــم مــراهــق - <<الفصل الخامس>>
العرض العادي
