جعل جو الحب بعدي بالعمر يصفى لك
وجعل ذاك اللي ملكني بالهوى يعتقني
رح عسى درب السعادة يا حبيبي فالك
لا تفكر في حياتي ابتعد واحرقني!
ابتعد والوعد مني دايم(ن)ببقالك
رح وانا متجمع(ن)بك قبل لا تفرقني
الله اللي خصّني في دنيتي بأمثالك
والله اللي لا رحلت بشوفتك يرزقني
بشتعل لين انطفي لك واشتهي اشعالك
بتحرى جيّتك لين الصبر يزهقني
وان حصل حسيت قلبي ميّت بيلجالك
صحت لك تكفى(دخيلك) ما قوى والحقني
وانت عاد بكيف كيفك يا تجي بوصالك
ولاّ تتركني لحالي والغلا يخنقني!
لا كتبت الشعر جيتك تسمعه واقرا لك
كنت اكذّب في قصيدي واطلبك صدقني
كنت اسابق خطوة الدرب لغرام خبالك
كنت اجيك وكن روحي بالوله تسبقني
جيتك من "اربع جهات الحب" شخص(ن)هالك
قلت اجدّد فيك قلبي والله يوفقني
ما يغيّرني جفاك مقيّد(ن)بحبالك
لا تحسب ان الهوى في غيبتك يسرقني
ما يشوقني لشوفك غير هرج هبالك
والحوار اللي ذبحني خايف يشوقني
السموحة لو تشوف القلب ذاب قبالك
والله انك ما دريت بجوفي اشذوّقني
ليت كل القصة اللي تحترق باهمالك
ما ابتديت بها ولا صار الذي وهقني
وليت ذاك اللي شرببته ما هو بفنجالك
غلطتي جيت مترهّي والبحر غرقني
يغفر الله لك ذنوب الحب في ترحالك
الاّ ذنب(ن)وقت قلبك داخله وثّقني
بس تكفى لاكبرت وصرت بين عيالك
شوف يمكن بالوراثة واحدن يعشقني
تكفى لاكبرت وصرت بين عيالك
شف يمكن بِ الوراثه واحدن يعشقني
تكفى لاكبرت وصرت بين عيالك
شف يمكن بِ الوراثه واحدن يعشقني