تستقبل بعمرك سنة
واودع بعمري سنين
وتقول لي ليش النكد؟
ليش انت هالليلة حزين؟
وأقول بدموع الكلام
هالعام مامر بسلام
هالعام سهرني ونام
شابت ذوايب فرحتي
وبشفتي ..
دفنت أنا وجه الفرح
لي من كثر همي انجرح
من بعد ما عني رحل
خذ من حياتي كل شي
حتى البكا والابتسام
يا صاحبي .....
هو أي عام أقبل ؟
وغادر أي عام
كيف أحتفل وياك
بالعام الجديد ؟
وما من جديد
الا الحزن كل عام
في عمري يزيد
والهم هو ضيفي الوحيد
اللي من دلالي يقول :
هل من مزيد ؟
يا صاحبي ...
كيف احتفل وياك واودع سنة ؟
عمرك سمعت بواحد
ودع بيوم واحتفل ؟
عمرك سمعت بواحد
يضحك اذا عمره رحل ؟
يا صاحبي
تعال لي ببكي معك
على الشباب اللي يفوت
والعمر لي فينا يموت
ان كنت ناوي تحتفل
بمرور .. أو بقدوم عام !
من "روزنامة عمرنا "
طاحت سنة
يعني الخريف ..
يعني الصفار ..
يعني السنين بعمرنا
صارت تهيف !
وين الربيع اللي نعيشه من سنين ؟
ليش لطفولتنا نسافر
بالحنين؟
يا صاحبي ..
من "روزنامة" عمرنا
تتساقط أيام وشهور
من عمرنا تاخذ بطاقات المرور
الى القبور!
يا صاحبي ..
هذا احتفالي والسلام
لا تحتفل مثلي اذا ودعت عام
ولا تفرح ان قابلت عام ..
روح احتفل بالدمع في عينك
ونام
بس ادعي ربك يجعله
في عمرنا يمر بسلام !
</B></I>