جتكم وصوف المسرجات السريعات
يالله عسا مااقول بالوصـف زلّـه
اللون وجه اللي غدا شملـه اشتـات
ولاّ كمـا بـنّ اليمـن وسـط دلّـه
والراس حجمه معتـدل بالقياسـات
لاهـو صغيـر ولا كبيـر ٍ تملّـه
وآذانهـا ارقاقـه وملـس ٍلطيفـات
اقـلام منتصبـات مثـل الاخـلّـه
واعيونهـا برّاقـه ومستطـيـلات
عيـن الفتـاه اللـي لحقهـا مملّـه
والناصيه فوق العيـون الكحيـلات
مثل السعف ومن الحـراره تضّلـه
والجبهـه تشابـه ليـوم البشـارات
تـزفّ للمحـزون فرقـا المـذلّـه
ومناخـره متباعـدات ووسيعـات
وامـدوّرات وللنفـس سهّـل ٍ لـه
والفم واشدوقه وسـاع وطويـلات
تحت اللجـام شدوقـه ايمهـل ٍ لـه
واعناقها ماهن عراض وقصيـرات
طويلـة ٍ والكتـف مالصّقـن ٍ لـه
والعرف مسترسل كما شعور خفرات
والجذع صلب ومشرف ٍ غاربٍ لـه
واصدورها متنهّضـات ورحيبـات
والظهر فوق الكاهـل مناسـبٍ لـه
والبطن كنز اهل الخيول الاصيلات
رحيـب بالأنثـى وضامـر بخلّـه
واقطيّهـا متشبّعـات وعريضـات
صلبـة قوايـم مابهـا كـلّ علّـه
والذيل شعـر الفاتنـات الجميـلات
اللي لهـن بالقلـب عهـد وسجلّـه
هذي وصوف الخيل ياهل البطولات
ويالله عسا بالوصـف مافيـه زلّـه