.
البارحه مدري وش اللي خذاني
يوم اجنبو عني من الضيقه اشملت
جيت اتكلم بس عيّا لساني
ماكنّي الا مرتكب ذنب واخملت !
الله يسامح من ذكرت ونساني
وانا ادري اني لاذكرته تجملت
عانيت وادري كل طيب يعاني
وعلى حساب طعوني الخضر جاملت !
ياما خذو مني ولاحدٍ عطاني
من طيبتي في حق نفسي تساهلت
عزاي لا منه تجهم زماني
يممت وجهي للكريم وتوسلت !
واللي يبي قربي وبعدي لقاني
امشي على وضح النقا ماتختلت
مرات احس انك معي شخص ثاني
ومرات احس انك حبيبي ومازلت !
لا تفرح انك دجت بين المحاني
لو ما تخون الذاكره ما تسللت
عشان ماضيك الجميل وعشاني
حاول تشيل من الوفاء ربع ماشلت !
ماني على خبرك حبيبي تراني ,
حتى عن صغار الاماني تنازلت 
.