شدوا ويمتهم جنوبٍ عن الديره
وأقفوا وأنا قلبي من الهمّ مرضاني
أقفت مراكبهم ألا يالله الخيره
وعيني تفيض الدمع بفراق خلاني
واليوم طاح الحظ على الله تدبيره
قم لا عدمتك حظ يكفيني ماجاني
قلبي فقد ربعه فقدهم مساييره
ما عاد عيني تشوف خلانها ثاني
ياليت لي قلبٍ سطي على الشيره
ودي أطيع الشور والقلب يعصاني
هذا حبيبي ضي قلبي وتنويره
سعدي إلى شفته وإلى أقبلت حياني
يالله ترده لي وأنا أقبل معاذيره
يالله ترده لـي على كيد عـدوانـي
عجزت أبلقى من يعوضني بغيره
يفداه كل الخلق قاصيه والداني