أبي من يحتضن عمر ٍ رشف من دنيته غربال
............. تمنى والأماني .. لاتمنى .. جات معطوبه

أيا صدر الورق خل الشعور بداخلك يختال
............. يجوز تشيل من ثوب الوجع .. ماتخفي جيوبه

ابصب الحبر / دمعي واقهوي هالسطر فنجال
............. مدام النار لدلال الهموم اليوم مشبوبه

أنا ماعاد بي حيل ومشاويري تهد الحال
.............أنا قطعة سواد الحظ وكل حي ٍ ومكتوبه

قسم بالله أحس إن الحزن فيني يهز جبال
............. ياليت أول تفاصيل الغرام وطيشنا أكذوبه

مافيه أقسى من إنه ينقهر في هالزمن رجال
............. عقب ماهو قهر جد السنين وعلمّ التوبه