تبي عمري ابشر حافظه لك وعده جاك
وانا الصادق اللي تلمح الصدق في عينه
.
وحقك هو الباقي ماهو فايت يفداك
انا ماملك الفايت تبي باقي سنينه
.
بقى الثلث من عمري وذا الشي ما يخفاك
خذا الثلث وابشر بالعوض خل ثلثينه
.
مصفيه لك من زايل الشك والا شاك
من اللي تشرف بك تمده لك يدينه
.
هدية غلا يفداك من حشمك واهداك
وتكفى طلبتك خلها بينك وبينه
.
أنا مستحي ما هوب قدرك ولاشرواك
وانا أهديك عمري وانت راعيه من حينه
.
تأخرت صح وحيك اللي تجي وامداك
ولاعاد أبي من غيرك اليوم تطمينة
.
ولا قصدي أسهب بس في نفسي استدراك
مضى الباهت وباقيه بيديك تلوينه
.
واذا قلت لي هاته وراضيه وش دراك
أبي مابقى لك قلت دوكيه من زينه
.
ولكن وكاتب رزقي اللي كتب فرقاك
خذا الوقت زينة وانت ما تنعطى شينة
.