يلومني من لاعرف عزوتي شمر
ولامر حايل وشاف الجود بعيونه
ولاشاف عينا ترحب وكفا يهلي
وبابا على شان ضيفه مايصكونه
صغيرنا من ينولد ينولد حاتمي
وهام المعالي يموت ولا يجي دونه
وكبيرنا بس تغني ضحكة حجاجه
لضيفه لو انه يقوم ولا يعشونه
وحاتم لو انه مجاور غيرهم شمر
ماصار مضرب مثل والناس يطرونه
الشمري مايصك الباب عن جاره
وعينه عن عيوب جاره دوم مكنونه
والشمري لا عطى ماينلحق مده
جوده بحر والمكارم فيه مدفونه
والشمري لانخيته أبشر بعزك
يجيك كله لو أنك طالب عيونه
ولاجاء نهار المعادى واحتما ضربه
وقامت تفوح المنايا ريحة طعونه
يجي على الموت كنه عاشقا مغرم
وتشوف موتك بعينه ساكن جفونه
هم عزوتي لاتعزوى كلن بربعه
وهم تاج راسي وراس المجد وعيونه
وهم الطنايا وياقل الحكي عنهم
تقصر طوال القصايد عنهم متونه