على صدر الورق بوح المشاعر ياوفاء الأقلام=تحمل ياورق حزن البيوت اللـي تحاكينـي
أنا المجروح في ظل السكوت وثورة الأوهـام=وانا المبحوح صوتي من عناي اللي مكفينـي
كفايه مانبي صمت الشعور يكبل الأحـلام=وانا لولا غلاتـه مازرعتـه فـي شرايينـي
تنفسته عشقته طفل ماينطق سوى التمتـام=حضنته في ضلوعي لجل يكبر فـي ميادينـي
كبر واسقيته العذب الزلال وروعة الألهـام=لجل لامت باكـر يعتـزي ويقـوم يحيينـي
ابيه يشيلني فـوق الثريـا نركـز الأعـلام=يدينه فـي يدينـي والبيـارق بينـه وبينـي
تركني في غياهيب الظروف في لحظة استسلام=هجرني قبل عام من الجلوس اللي ملا عينـي
انا ماني كذا ياهل الوفا يانـاس يـا إعـلام=انا فيني قصيـدٍ يشغـل العالـم ويرضينـي
انا الساهر على دمع اليتامى بلـل الأكمـام=توسدت الكفوف اللي عدمهـا مايبكينـي
يبكيني دموع إيتام وصغرهم ثلاث اعـوام=ابوهم راح في ليلٍ كئيـب ومـن يعزينـي
كسا ليل الحزن ثوب الحداد بحكمة الأسلام=وذا قفيـت نادتنـي اليتيمـه لاتخليـنـي
انا ماني كذا وارفض كلام العـاذل الهـدام=انا راجع على نفس الطريق اللـي يودينـي
رجع بوح المشاعر وانقذ الشاعر من الأعدام=ولايرضي غروري غير حلم ساكـنٍ فينـي
ابيه يحطني فـوق الثريـا والوعـد قـدام=يدينه فـي يدينـي والبيـارق بينـه وبينـي
.
.
.