؛,؛
رحلت.. وكل فرحٍ داسته خطوات رجلينك
معاك دموع عيني، وانكسار، وصوت لوّامي
وأردد "وينك"، وكن الكلام احتكرته "وينك"!
وأنا بأرض الفراق ألبس طموح بـْأستر أوهامي!!
شريت الحلم ورد وقلت أصفّه في بساتينك
ولكن كتّف أسلوبك يديّ ومات قدّامي
شعرت إن صدّتك شق بشفايف فرحي، ولينك..
سراب، وكن ريقي ذكرياتك وأعشقك ظامي
كتبتك ألف بيتٍ رجّحوا كفّة موازينك
الين اكتظت أوراقي حنين، وجفّت أقلامي
أعد اللحظة اللي كنت أحبّك وألعن "اثنينك"
هذاك اللي خذاك! استغفر الله "أتعس أيّامي"!!
تربّع يا العذاب بْوسط صدري، دفّ كفّينك
حسيبك ما بعد رمّد مصابه والجَمر حامي
؛,؛